مەملەكەت باسشىسى پارلامەنت ءماجىلىسىنىڭ ءتوراعاسى ەرلان قوشانوۆتى قابىلدادى

پارلامەنتتىڭ تومەنگى پالاتاسىنىڭ جۇمىسى تۋرالى ايتىلدى.

قاسىم-جومارت توقايەۆقا «جاڭا قازاقستان: جاڭارۋ مەن جاڭعىرۋ جولى» اتتى جولداۋىنىڭ نەگىزگى باعىتتارىن زاڭنامالىق تۇرعىدان قامتاماسىز ەتۋ جونىندەگى تومەنگى پالاتانىڭ اتقارىپ جاتقان جۇمىستارى تۋرالى مالىمەت بەرىلدى، دەپ حابارلايدى Almaty-akshamy.kz اقوردا سايتىنا سىلتەمە جاساپ.

پرەزيدەنتكە بەرىلگەن اقپاراتقا سايكەس، ەكىنشى سەسسيا باستالعالى بەرى ءماجىلىس دەپۋتاتتارىنىڭ قاراۋىنا 96 زاڭ جوباسى تۇسكەن جانە ونىڭ 53ء-ى ماقۇلدانىپ، سەناتقا جولدانعان.

سونىمەن قاتار ءماجىلىس ءتوراعاسى پارلامەنتتىڭ تومەنگى پالاتاسى جۇمىسىنىڭ جاڭا فورماتتارى تۋرالى ايتتى. دەپۋتاتتار ەندى ءوز جۇمىستارىندا اشىقتىقتى ارتتىرۋعا، پارلامەنتتىك مادەنيەتتى نىعايتۋعا جانە حالىقپەن اراداعى ىقپالداستىقتى كۇشەيتۋگە باسا ءمان بەرەدى. قوعامداعى وتە ماڭىزدى ماسەلەلەر بويىنشا پارلامەنتتىك تىڭدالىمدار مەن باسقا دا ءىس-شارالار ءجيى وتكىزىلەدى.

پارلامەنتتىڭ تومەنگى پالاتاسىندا ازاماتتاردىڭ وتىنىشتەرى مەن تالاپ-تىلەكتەرىنە، سونىڭ ىشىندە دەپۋتاتتاردىڭ وڭىرلەرگە ساپارى بارىسىندا كوتەرىلگەن ماسەلەلەرگە قاتىستى جۇمىستىڭ جاڭا تەتىكتەرى ەنگىزىلەدى. ءماجىلىس دەپۋتاتتارى جەرگىلىكتى جەرلەردە سايلاۋشىلارمەن تۇراقتى كەزدەسۋلەر وتكىزەدى.