مەملەكەت باسشىسى مىرزاتاي جولداسبەكوۆتى مەرەيتويىمەن قۇتتىقتادى

پرەزيدەنت قاسىم-جومارت توقايەۆ مەملەكەت جانە قوعام قايراتكەرى مىرزاتاي جولداسبەكوۆتى 85 جاسقا تولۋىمەن قۇتتىقتاپ، جەدەلحات جولدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ. 

«حالقىمىز ءوزىڭىزدى مەملەكەت جانە قوعام قايراتكەرى، عالىم، قارىمدى قالامگەر رەتىندە جاقسى بىلەدى جانە قۇرمەتتەيدى. ۇستازدىقتان باستالعان ەڭبەك جولىڭىزدا مينيستر، پرەمەر-مينيستردىڭ ورىنباسارى، ەلشى، ۋنيۆەرسيتەت رەكتورى، پرەزيدەنتتىك ورتالىقتىڭ باسشىسى سياقتى جاۋاپتى لاۋازىمداردى ابىرويمەن اتقارىپ، ەلىمىزدىڭ مارتەبەسى مەن بەدەلىنىڭ ارتا تۇسۋىنە اتسالىستىڭىز. ادەبي قازىنامىزدىڭ قاينار بۇلاعى بولعان اقىن-جىراۋلاردىڭ شىعارماشىلىعىن جاڭا قىرىنان كورسەتىپ، قازاق ءۇشىن ايتىس ونەرىنىڭ ايرىقشا ءرول اتقاراتىنىن دالەلدەپ بەردىڭىز. ورحون-ەنيسەي جازبا ەسكەرتكىشتەرىن تەرەڭ زەردەلەدىڭىز. ءسىزدىڭ قالامىڭىزدان شىققان «ەجەلگى ادەبيەت نۇسقالارى»، «كۇلتەگىن»، «اسىل ءسوزدىڭ اتاسى»، «كىسىلىك كىتابى»، «تاڭعالامىن ءومىردىڭ عاجابىنا» جانە باسقا دا كىتاپتارىڭىز – ۇلتتىق قۇندىلىقتارىمىزدى دارىپتەۋ مەن جاڭعىرتۋدىڭ جارقىن ۇلگىسى. الداعى ۋاقىتتا دا قوعامدىق-ساياسي ىستەرگە بەلسەندى اتسالىسىپ، ەل-جۇرتتىڭ شىنايى قۇرمەتىنە بولەنىپ، مەرەيىڭىزدىڭ ۇستەم بولا بەرۋىنە تىلەكتەستىك بىلدىرەمىن»، – دەپ جازىلعان قۇتتىقتاۋ جەدەلحاتىندا.