مەملەكەت باسشىسىنا كومپانيانىڭ بيىل ءبىرىنشى جارتىجىلدىقتا اتقارعان وپەراسيالىق جانە قارجىلىق قىزمەتىنىڭ ناتيجەسى تۋرالى ەسەپ بەرىلدى. پرەزيدەنتكە "قازمۇنايگاز" كومپانياسى بىلتىرعى وسى كەزەڭمەن سالىستىرعاندا بارلىق نەگىزگى كورسەتكىش بويىنشا وسىمگە قول جەتكىزگەنى باياندالدى، دەلىنگەن اقوردا حابارلاماسىندا.
ماعزۇم مىرزاعالييەۆ ءىرى ينۆەستيسيالىق جوبالاردىڭ جۇزەگە اسىرىلۋ بارىسى، اتاپ ايتقاندا، اتىراۋ وبلىسىندا قۋاتى جىلىنا 1 250 مىڭ توننا پوليەتيلەن وندىرەتىن زاۋىتتىڭ جانە ماڭعىستاۋ وبلىسىنىڭ جاڭاوزەن قالاسىندا جاڭارتىلاتىن ەنەرگيا كوزدەرىن پايدالانۋ ارقىلى جۇمىس ىستەيتىن گيبريدتى ەلەكتر ستانسياسىنىڭ قۇرىلىسى جونىندە ايتتى.
مەملەكەت باسشىسىنا مۇناي وڭدەۋ زاۋىتتارىنىڭ جۇمىسى، جانار-جاعارماي ماتەريالدارى ءوندىرىسىنىڭ قارقىنى جانە ولاردىڭ قورىن قالىپتاستىرۋ تۋرالى مالىمەت بەرىلدى. اتاپ ايتقاندا، "قازمۇنايگاز" فرانسيانىڭ Air Liquide كومپانياسىمەن بىرلەسىپ، پاۆلودار مۇناي حيمياسى زاۋىتىندا 160 مىڭ تونناعا دەيىن قىسقى ديزەل وتىنىن وندىرۋگە مۇمكىندىك بەرەتىن جوبانى ىسكە اسىرۋعا نيەتتى.
كەزدەسۋ سوڭىندا قاسىم-جومارت توقايەۆ گەولوگيالىق بارلاۋ جۇمىستارىن دامىتۋ جانە پەرسپەكتيۆتى بارلاۋ ۋچاسكەلەرىن زەرتتەۋ ءۇشىن ءىرى ينۆەستورلار تارتۋ جونىندە ءبىرقاتار تاپسىرما بەردى.