مەملەكەت باسشىسى «كاۋسار» وقۋشىلار سارايىن ارالاپ كوردى

قاسىم-جومارت توقايەۆ قاراعاندى قالاسىنىڭ پريشاحتينسك ىقشاماۋدانىندا تاياۋدا عانا اشىلعان «كاۋسار» وقۋشىلار سارايىنىڭ قىزمەتىمەن تانىستى، دەپ حابارلايدى aqshamnews.kz.

مەملەكەت باسشىسىنا مۇنداعى 13 ۇيىرمە مەن سەكسياعا 1600 بالا قاتىساتىنى جايىندا مالىمەت بەرىلدى. وقۋشىلار يگىلىگى ءۇشىن ورتالىقتا HI-TECH سەح، شىعارماشىلىق شەبەرحانا، حورەوگرافيا زالى، ART-ستۋديا، دىبىس جازۋ، تەليەۆيدەنيە جانە فوتو ستۋديالارى، VR-ارحيتەكتۋرا جانە WEB-ديزاين كابينەتتەرى، Intellectum-ستۋديا، ينتەرنەت زاتتارى كابينەتى، روبوتتى تەحنيكا جانە تەحنيكالىق شىعارماشىلىق زەرتحاناسى، STEM-زەرتحانا، مۋزىكالىق ستۋديا، ەكولوگيالىق ورتالىق، سپورت جانە ويىن الاڭدارى اشىلعان.

جالپى اۋدانى 3،3 مىڭ شارشى مەتر بولاتىن عيمارات ساپالى قوسىمشا ءبىلىم الۋعا قاجەتتى قۇرالدارمەن تولىقتاي جابدىقتالعان.

مەملەكەت باسشىسى جاس ۇرپاقتىڭ شىعارماشىلىق جانە كرەاتيۆتى دامۋىنىڭ ءمانى زور ەكەنىنە نازار اۋداردى. سونداي-اق قورشاعان ورتانى قورعاۋعا، سونىڭ ىشىندە «تازا قازاقستان» ەكولوگيالىق اكسياسىن وتكىزۋگە باسا ءمان بەرەتىنىن اتاپ ءوتتى. پرەزيدەنت وقۋشىلاردى وسى ماڭىزدى باستاماعا بەلسەندى تۇردە اتسالىسۋعا شاقىردى.