2011 جىلدىڭ 20 قازانىنداعى جارلىق بويىنشا، 28 ماۋسىم - بايلانىس جانە اقپارات قىزمەتكەرلەرىنىڭ كۇنى بولىپ بەلگىلەندى.
كاسىبي مەرەكەگە وراي، ەل پرەزيدەنتى جۋرناليستەردى قۇتتىقتادى، دەپ حابارلايدى Almaty-akshamy.kz اkorda.kz سايتىنا سىلتەمە جاساپ.
قۇرمەتتى جۋرناليستەر، بۇقارالىق اقپارات قۇرالدارىنىڭ قىزمەتكەرلەرى!
بارشاڭىزدى كاسىبي مەرەكەلەرىڭىزبەن شىن جۇرەكتەن قۇتتىقتايمىن!
اقپارات سالاسى – قوعامدىق پىكىر قالىپتاستىراتىن ماڭىزدى سالا.
«حالىقتىڭ كوزى، قۇلاعى ءھام ءتىلى» رەتىندە ەلگە ادال قىزمەت ەتۋ – ءار ءجۋرناليستىڭ ابىرويلى مىندەتى.
سىزدەر قاشاندا ۇلت مۇددەسىن بارىنەن بيىك قويىپ، ەل قامى ءۇشىن قالام تارتىپ جۇرسىزدەر.
مەملەكەتشىلدىك قۇندىلىقتى دارىپتەپ، جاسامپازدىق پەن جاقسىلىقتىڭ جارشىسى بولىپ كەلەسىزدەر.
اقپارات سالاسىن دامىتۋعا مەملەكەت تاراپىنان قاشان دا ەرەكشە كوڭىل بولىنەدى.
ءوز كاسىبىنىڭ مايتالمانى بولعان قارىمدى جۋرناليستەرگە قولداۋ كورسەتىلەدى.
ب ا ق سالاسىنداعى ءداستۇرلى پرەزيدەنت سىيلىعى – سونىڭ ءبىر كورىنىسى.
ونىڭ يەگەرى اتانعان ازاماتتاردىڭ ەسىمى قازاق جۋرناليستيكاسىنىڭ جىلناماسىنا جازىلاتىنى ءسوزسىز.
جىل سايىن ەڭ تاڭداۋلى جۋرناليستەرگە بەرىلەتىن ماراپات وسىمەن جيىرما بەسىنشى رەت تابىستالىپ وتىر.
بۇل سىيلىققا قاستەرلى تاۋەلسىزدىگىمىزدىڭ 30 جىلدىعى قارساڭىندا يە بولۋدىڭ دا سيمۆولدىق ءمانى بار.
سىزدەر ەگەمەندىك جىلدارىندا ۇرپاقتىڭ بويىنا ازاتتىق رۋحىن سىڭىرۋگە زور ۇلەس قوستىڭىزدار.
مەن مەملەكەت پەن قوعامنىڭ ورتاسىندا التىن كوپىر بولىپ جۇرگەن جۋرناليستەردىڭ ەڭبەگىن جوعارى باعالايمىن.
ءارقايسىڭىز شىنايى اقپارات تاراتۋدىڭ جاۋاپكەرشىلىگىن سەزىنىپ، ۇلتتىق مۇددەنىڭ بيىگىنەن كورىنە بەرەدى دەپ سەنەمىن.
ەلىمىز بەرەكەلى بىرلىك پەن ىرىستى ىنتىماقتىڭ ارقاسىندا وسىپ-وركەندەي ءتۇسسىن!
جۋرناليستەر جاعىمدى جاڭالىعىمەن جۇرتشىلىقتى قۋانتا بەرسىن!
بارشاڭىزعا شىعارماشىلىق شابىت، تولاعاي تابىس تىلەيمىن!
مەرەكە قۇتتى بولسىن! - دەدى پرەزيدەنت قاسىم-جومارت توقايەۆ.