پرەزيدەنت قاسىم-جومارت توقايەۆ جاپونيانىڭ باتىسىنداعى نوتو تۇبەگىندە بولعان جەر سىلكىنىسى سالدارىنان كوپتەگەن ادامنىڭ قازا تابۋىنا بايلانىستى پرەمەر-مينيستر فۋميو كيشيداعا كوڭىل ايتتى.
«ەلىڭىزدە ورىن العان جويقىن جەر سىلكىنىسى سالدارىنان كوپتەگەن ادامنىڭ قازا تاپقانى جانە زارداپ شەككەنى تۋرالى سۋىت حاباردى تەرەڭ كۇيزەلىسپەن قابىل الدىم. وسىنداي اۋىر ساتتە سىزگە جانە جاقىندارىنان ايىرىلعان وتباسىلارعا قازاقستان حالقىنىڭ جانە ءوزىمنىڭ اتىمنان قايعىرا كوڭىل ايتامىن. تابيعي اپاتتان جاراقات العانداردىڭ تەز ارادا ساۋىعىپ، ءىز-تۇسسىز جوعالعان ازاماتتاردىڭ وتباسىلارىنا امان-ەسەن ورالۋىنا تىلەكتەستىك بىلدىرەمىن»، – دەپ جازىلعان جەدەلحاتتا.