پرەزيدەنتكە ءال-فارابي اتىنداعى قازۇۋ رەكتورى ۋنيۆەرسيتەتتەگى مامان دايارلاۋ ءىسىنىڭ، عىلىمي-زەرتتەۋ جۇمىستارىنىڭ ناتيجەلەرى تۋرالى باياندالىپ، كەلەسى جىلى 90 جىلدىعىن اتاپ وتەتىن جوعارى وقۋ ورنىنىڭ ستراتەگيالىق دامۋ جوسپارى تانىستىرىلدى، دەپ حابارلايدى اlmaty-akshamy.kz.
جانسەيىت تۇيمەبايەۆ ۋنيۆەرسيتەتتە جالپى قۇنى 8،1 ميلليارد تەڭگە بولاتىن 400 عىلىمي جوبا ىسكە اسىرىلىپ جاتقانىنا توقتالدى. سونىمەن قاتار، پرەزيدەنتتىڭ مامىر ايىنداعى قحر-عا رەسمي ساپارى اياسىندا قازۇۋ-دا قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىن اشۋ جونىندە كەلىسىمگە قول قويىلعان بولاتىن. 12 قازاندا ۋنيۆەرسيتەت بازاسىندا اتالعان وقۋ ورنىنىڭ فيليالى اشىلعانىن جەتكىزدى. 2024-2026 جىلدارى قازۇۋ قالاشىعى قۇرىلىسىنىڭ ەكىنشى كەزەڭى جۇزەگە اسىرىلاتىنى جونىندە مالىمەت بەردى. جاڭا قالاشىقتا 8 وقۋ كورپۋسى، تەحنوپارك جانە 12 جاتاقحانا بوي كوتەرسە، جۋىق ارادا 3180 ورىندىق 3 جاتاقحانانىڭ قۇرىلىسى باستالاتىنى جايىندا پرەزيدەنتكە باياندادى.
كەزدەسۋ سوڭىندا قاسىم-جومارت توقايەۆ ءبىلىم ساپاسىن جاقسارتۋ، ەلىمىزدىڭ دامۋىنا عىلىمنىڭ قوساتىن ۇلەسىن ارتتىرۋ جانە ۋنيۆەرسيتەت قالاشىعىن جاڭعىرتۋ جونىندە ناقتى تاپسىرمالار بەردى.