قۇتقارۋشىلار ونى شامنىڭ باتارەياسىنداعى جەكە ءنومىرى ارقىلى تانىعان.
كەشە كەشكە كوستەنكو شاحتاسىندا تاۋ-كەن تازارتۋ كەنشىسى الەكساندر پروكۋديننىڭ دەنەسى تابىلدى، دەپ حابارلايدى Almaty-akshamy.kz جەرگىلىكتى اكىمدىكتىڭ مالىمەتىنە سىلتەمە جاساپ.
6 قاراشا كۇنى كەشكە تاۋ-كەن قۇتقارۋشىلارى جاقىندا عانا اپات بولعان قاراعاندى وبلىسى كوستەنكو اتىنداعى شاحتادان 46-شى كەنشىنىڭ دەنەسىن تاپتى.
"6 قاراشا كۇنى ساعات 20:00-دە كوستەنكو اتىنداعى شاحتادان قازا تاپقان 46-شى كەنشىنىڭ دەنەسى تابىلىپ، جەر بەتىنە كوتەرىلدى. ءتيىستى ساراپتامالار جۇرگىزىلدى. ىزدەستىرۋ جۇمىستارىنا "كاسىبي اسكەري اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى" ج ش س قاراعاندى فيليالىنىڭ تاۋ-كەن قۇتقارۋشىلارى جۇمىلدىرىلدى. ىزدەۋ جۇمىستارى تاۋلىك بويى جۇرگىزىلدى"،-دەپ حابارلادى قاراعاندى وبلىسىنىڭ اكىمدىگى.
ايتا كەتەيىك، بۇعان دەيىن توتەنشە جاعدايلار مينيسترلىگى ونىڭ دەنەسىنىڭ ءبىر بولىگى تابىلعانىن حابارلاعان بولاتىن. الايدا مينيسترلىك ساراپتاما قاجەت ەكەنىن ايتىپ، رەسمي تۇردە اقپارات بەرمەگەن ەدى.