مەملەكەت باسشىسى حالىقارالىق شاحمات فەدەراسياسىنىڭ پرەزيدەنتىن قابىلدادى

ەلىمىزدە 200 مىڭنان استام ادام شاحماتپەن اينالىسادى.

مەملەكەت باسشىسى قاسىم-جومارت توقايەۆ حالىقارالىق شاحمات فەدەراسياسىنىڭ پرەزيدەنتى اركاديي دۆوركوۆيچتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.

قاسىم-جومارت توقايەۆ اركاديي دۆوركوۆيچتى حالىقارالىق شاحمات فەدەراسياسىنىڭ (فيدە) پرەزيدەنتى لاۋازىمىنا جۋىردا قايتا سايلانۋىمەن قۇتتىقتادى.

كەزدەسۋ بارىسىندا مەملەكەت باسشىسىنا استانادا الەمنىڭ 12 مىقتى شاحماتشىسىنىڭ باسىن قوسقان فيدە گران-پري ايەلدەر سەرياسىنىڭ ءبىرىنشى كەزەڭىنىڭ وتكىزىلۋى تۋرالى مالىمەت بەرىلدى. قاسىم-جومارت توقايەۆ وسىنداي دەڭگەيدەگى ءىس-شارالاردى وتكىزۋ ەلىمىزدەگى شاحمات سپورتىنىڭ دامۋىنا ەلەۋلى ۇلەس قوساتىنىن اتاپ ءوتتى.

«قازاقستاندا شاحمات كەڭىنەن تانىمال، اسىرەسە، بالالار مەن جاستار اراسىندا. بىزدە 7 مىڭنان استام سەكسيا جۇمىس ىستەيدى، دەگەنمەن بۇل كورسەتكىشتى كەمىندە ەكى ەسە ارتتىرۋعا ءتيىسپىز. ءقازىر شاحماتپەن 200 مىڭنان استام ادام اينالىسادى. قازاقستاندىق شاحماتشىلار حالىقارالىق جارىستاردا ءساتتى ونەر كورسەتىپ ءجۇر. ءبىز بۇل سپورتتى قولداۋعا باسا ءمان بەرەمىز. شاحماتتى دامىتۋدىڭ جول كارتاسى ازىرلەندى. «مەكتەپتەگى شاحمات» اۋقىمدى جوباسىن جۇزەگە اسىرۋ جوسپارلاپ وتىر»، – دەدى مەملەكەت باسشىسى.

ءوز كەزەگىندە اركاديي دۆوركوۆيچ قازاقستاندا شاحماتتى جەكە قولداعانى جانە تانىمال سپورتقا اينالدىرعانى ءۇشىن قاسىم-جومارت توقايەۆقا ريزاشىلىعىن ءبىلدىرىپ، فيدە شاحماتتى مەكتەپ باعدارلاماسىنا ەنگىزۋ جونىندەگى حالىقارالىق تاجىريبەسىن بولىسۋگە دايىن ەكەنىن جەتكىزدى.

سونىمەن قاتار ولار قازاقستان مەن فيدە اراسىنداعى ۇزاق مەرزىمدى ىنتىماقتاستىق ماسەلەلەرى جونىندە پىكىر الماسىپ، ەلىمىزدە ءىرى حالىقارالىق تۋرنيرلەر وتكىزۋ پەرسپەكتيۆالارىن تالقىلادى.