ەلىمىز ينۆەستيسيالىق احۋالدى جاقسارتۋعا ەرەكشە كوڭىل بولەدى
قازاقستان پرەزيدەنتى قاسىم-جومارت توقايەۆ اقوردا رەزيدەنسياسىندا شەت مەملەكەتتەردىڭ ءىرى ينۆەستيسيالىق كومپانيالارى وكىلدەرىمەن كەزدەستى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
جيىندا مەملەكەت باسشىسى شەتەلدىك ينۆەستيسيالار قازاقستان دامۋىنىڭ نەگىزگى فاكتورلارىنىڭ بىرىنە اينالعانىن، سوندىقتان ەلىمىز ينۆەستيسيالىق احۋالدى جاقسارتۋعا ەرەكشە كوڭىل بولەتىنىن اتاپ ءوتتى.
«بۇل سالاداعى جۇيەلى ءارى جان-جاقتى جۇمىستار ءبىزدى ورتالىق ازياداعى ەڭ ءىرى، پوستكەڭەستىك كەڭىستىكتە جىلدام دامىپ كەلە جاتقان ەكونوميكالاردىڭ بىرىنە اينالدىردى. تاۋەلسىزدىك جىلدارى شەتەلدەن 370 ميلليارد دوللاردان استام تىكەلەي ينۆەستيسيا تارتتىق. مەملەكەت ينۆەستورلاردى بارلىق جاعىنان قولداۋعا باسىمدىق بەرەدى. ءبىز ءاربىر ينۆەستوردى جەكە ءارى كەشەندى قولداۋ قاعيداتىن ەنگىزدىك»، – دەدى قاسىم-جومارت توقايەۆ.
پرەزيدەنت تىكەلەي ءوزى ءتوراعالىق ەتەتىن شەتەلدىك ينۆەستورلار كەڭەسىنىڭ ينۆەستورلارمەن ءوزارا ىقپالداسۋ ءۇشىن نەگىزگى الاڭ ەكەنىن اتاپ ءوتتى. ناقتى سەكتورعا تىكەلەي ينۆەستيسيا تارتۋدان بولەك قۇندى قاعازدار نارىعىن دامىتۋ مەن شەتەلدىك پورتفەلدى ينۆەستورلاردى ەلگە اكەلۋگە ەرەكشە كوڭىل ءبولىنىپ كەلەدى. مەملەكەت باسشىسى قازاقستاننىڭ ايماقتاعى ءىرى كاپيتال نارىعىن قۇراپ وتىرعانىن جەتكىزدى.
«ۇلتتىق بانك نەگىزگى قارجىلىق رەتتەۋشى رەتىندە قور نارىقتارىن ودان ءارى دامىتۋ جولىندا بەلسەندى جۇمىس ىستەپ جاتىر. قازاقستاندا بۇل سالانىڭ قۇقىقتىق جانە ينفراقۇرىلىمدىق باعىتى جەتىلدىرىلگەن. ەلىمىزدە ەكى قور بيرجاسى – الماتىداعى KASE جانە استانا حالىقارالىق قارجى ورتالىعى تابىستى قىزمەت اتقارىپ كەلەدى»، – دەدى مەملەكەت باسشىسى.
پرەزيدەنتتىڭ ايتۋىنشا، الەمدەگى جەتەكشى ۋران ءوندىرۋشى «قازاتومونەركاسىپ» كاسىپورىنى مەن قارجى تەحنولوگياسى بويىنشا ايماقتاعى كوشباسشى Kaspi.kz IPO-لارى كاپيتال نارىعىنىڭ ديناميكاسىن ارتتىرىپ، ىلگەرىلەۋىنە ۇلەس قوستى.
قاسىم-جومارت توقايەۆ ءقازىر ەلىمىزدە جەكەشەلەندىرۋ بويىنشا اۋقىمدى جۇمىستار اتقارىلىپ جاتقانىن ايتتى.
«قازىرگى ۋاقىتتا قازاقستان ەكونوميكاسىنىڭ مۇناي-گاز، ەنەرگەتيكا، ينفراقۇرىلىم جانە باسقا دا سالالارىندا 700-دەن استام مەملەكەتتىك كاسىپورىندى جەكەشەلەندىرۋ بويىنشا اۋقىمدى جۇمىستار جۇرگىزىلۋدە. ءبىز ءىرى كومپانيالاردىڭ اكسيالارىنىڭ ۇلتتىق قور بيرجالارىندا تىركەلگەنىن قۇپ كورەمىز»، – دەدى مەملەكەت باسشىسى.
پرەزيدەنت بۇگىنگى كەزدەسۋ قازاقستاندىق كاپيتال نارىقتارىنا شەتەلدىك ينۆەستيسيالاردى كوپتەپ تارتۋ تۋرالى پىكىر الماسۋعا تاماشا مۇمكىندىك بەرەتىنىن ايتتى. سونىمەن قاتار قاسىم-جومارت توقايەۆ وسىنداي كەلەلى جيىندى تۇراقتى تۇردە وتكىزۋدىڭ ماڭىزدى ەكەنىن اتاپ ءوتتى.
جيىندا «Blackrock»، «Luxor Capital»، «Lugard Road Capital»، «Aberdeen Asset Management»، «Capital Group»، «Sands Capital»، «Alameda Research & FTX»، «Kingsway Capital» كومپانيالارىنىڭ جەتەكشىلەرى ءسوز سويلەدى.