مەملەكەت باسشىسى الدىمەن شري-لانكا پرەزيدەنتى رانيل ۆيكراماسينگحەمەن كەزدەستى
كەزدەسۋ بارىسىندا مەملەكەت باسشىسى ەكى ەل اراسىندا ءوزارا قولداۋعا جانە مازمۇندى ساياسي ديالوگقا نەگىزدەلگەن بەرىك سەرىكتەستىك قاتىناس ورناعانىن اتاپ ءوتتى. قازاقستان پرەزيدەنتى ساۋدا جانە ينۆەستيسيالىق بايلانىستاردى ودان ءارى جانداندىرا ءتۇسۋ ءۇشىن ۇكىمەتتەر دەڭگەيىندە پارمەندى شارالار قابىلداۋ قاجەت ەكەنىنە توقتالدى. سونىمەن قاتار قاسىم-جومارت توقايەۆ ۆيزا رەجيمىنە قاتىستى شارتتاردى جەڭىلدەتۋ جانە ەكى ەل اراسىندا تىكەلەي ءارى تۇراقتى اۋە رەيستەرىن اشۋ ماڭىزدى ەكەنىنە نازار اۋداردى.
تاراپتار حالىقارالىق ۇيىمدار اياسىندا، اتاپ ايتقاندا بۇۇ دەڭگەيىندە ءوزارا ىقپالداستىقتىڭ ماڭىزدى اسپەكتىلەرىن تالقىلادى. مەملەكەت باسشىسى شري-لانكا پرەزيدەنتىن كەلەسى جىلى وتەتىن استانا حالىقارالىق فورۋمىنا قاتىسۋعا شاقىردى.
مۇنان كەيىن قاسىم-جومارت توقايەۆ HMS Bergbau AG كومپانياسىنىڭ باسقارما ءتوراعاسى دەننيس ءشۆيندتى قابىلداپ، قازاقستاننىڭ شەتەلدىك ينۆەستورلاردى قولدايتىنىن جانە جوبالاردى تابىستى ىسكە اسىرۋ ءۇشىن قولايلى جاعداي جاسايتىنىن اتاپ ءوتتى. پرەزيدەنت الەمنىڭ دامىعان ەلدەرىنىڭ ەكونوميكاسى تاراپىنان ليتييگە سۇرانىس ارتىپ كەلە جاتقانىنا نازار اۋدارىپ، سيرەك كەزدەسەتىن مەتالداردى ءوندىرۋ جانە قايتا وڭدەۋ ىنتىماقتاستىقتى دامىتۋدىڭ اسا ماڭىزدى باعىتتارىنىڭ ءبىرى ەكەنىن ايتتى. مەملەكەت باسشىسى تاۋ-كەن ءوندىرۋ ونەركاسىبىنە قولايلى رەتتەۋ ەكوجۇيەسىن قالىپتاستىرۋ ءۇشىن قازاقستان بار كۇش-جىگەرىن جۇمسايتىنىن جەتكىزدى.
HMS Bergbau AG باسشىسى شىعىس قازاقستان وبلىسىندا ليتيي وندىرەتىن جانە ونى قايتا وڭدەيتىن كەن بايىتۋ كومبيناتىن سالۋ جوباسىن تانىستىردى. ونىڭ ايتۋىنشا، جوسپارلانعان ينۆەستيسيانىڭ جالپى سوماسى – 500 ميلليون دوللار. قاسىم-جومارت توقايەۆ مۇنداي ينۆەستيسيالىق جوبالاردىڭ ەل ەكونوميكاسى مەن ونىڭ الەمدىك ارەناداعى باسەكەگە قابىلەتتىلىگىن قولداۋ ءۇشىن ماڭىزدى ەكەنىن اتاپ ءوتتى.
HMS Bergbau AG – گەرمانياداعى قاتتى پايدالى قازبالاردى بارلاۋمەن جانە وندىرۋمەن اينالىساتىن جەتەكشى تاۋەلسىز كومپانيالاردىڭ ءبىرى. بۇل كومپانيا اقش، سينگاپۋر، وار، يندونەزيا، پولشا، ءباا، بوتسۆانا مەملەكەتتەرىندە شيكىزات ءوندىرۋ جۇمىستارىن بەلسەندى جۇرگىزەدى. سونداي-اق ونىڭ قىتايدا، ءۇندىستاندا، كەنيادا، مالايزيادا، پاكىستاندا، شري-لانكادا، بانگلادەشتە جانە ۆەتنامدا وكىلدىكتەرى بار.
پرەزيدەنت HHLA كومپانياسىنىڭ باسقارما ءتوراعاسى انگەلا تيتسراتپەن كەزدەسۋ بارىسىندا قازاقستان مەن گەرمانيانىڭ كولىك-لوگيستيكا سالاسىنداعى ىنتىماقتاستىعىن نىعايتۋ پەرسپەكتيۆالارى تالقىلاندى. مەملەكەت باسشىسى گەرمانيانىڭ كولىك جانە لوگيستيكا سالاسىن دامىتۋدا اتالعان كومپانيانىڭ ماڭىزدى ءرول اتقاراتىنىن ايتا كەلە، ونىڭ ەلىمىزدە فيليال اشۋ تۋرالى شەشىمىن قۇپتادى. قاسىم-جومارت توقايەۆ بۇل سالانىڭ قازاقستان ءۇشىن ستراتەگيالىق ماڭىزى زور ەكەنىن ايتتى. ويتكەنى ەلىمىز ەۋرازياداعى باستى ترانزيت تورابى رەتىندە ءوز پوزيسياسىن كۇشەيتۋگە نيەتتى. اڭگىمەلەسۋ بارىسىندا قازاقستان قۇرعاق جانە سۇيىق جۇكتەردى تاسىمالداۋعا ارنالعان جاڭا تانكەرلەر ساتىپ الۋ، سونداي-اق كاسپيي تەڭىزىندەگى اقتاۋ جانە قۇرىق پورتتارىن جاڭعىرتۋ ءۇشىن قارجى تارتۋعا مۇددەلى ەكەنى اتاپ ءوتىلدى.
HHLA – جەتەكشى ەۋروپالىق لوگيستيكالىق كومپانيا. كاسىپورىن گامبۋرگ، ودەسسا، تاللينن، تريەست قالالارىنداعى تەڭىز پورتى تەرمينالدارىنا، سونداي-اق ولارمەن بايلانىستىرىلعان ورتالىق جانە شىعىس ەۋروپاداعى ينتەرمودالدىق توراپتار جەلىسىنە يەلىك ەتەدى.
سونداي-اق، مەملەكەت باسشىسى جوعارى ساپالى دارى-دارمەك وندىرەتىن جەتەكشى كومپانيالاردىڭ ءبىرى، الەمنىڭ 120 ەلىندە ساتاتىن STADA Group كومپانياسىنىڭ ۆيسە-پرەزيدەنتى كريستوس گالليسپەن كەزدەستى.
كەزدەسۋ بارىسىندا دەنساۋلىق ساقتاۋ جانە فارماسيەۆتيكا سالالارىنداعى ىنتىماقتاستىق پەرسپەكتيۆالارى تالقىلاندى.
قاسىم-جومارت توقايەۆ STADA كومپانياسى دەنساۋلىققا قاجەتتى تۇتىنۋ تاۋارلارى سەگمەنتىندە قازاقستان نارىعىنداعى كوشباسشىلاردىڭ ۇشتىگىنە كىرەتىنىن اتاپ ءوتتى. پرەزيدەنتتىڭ ايتۋىنشا، الماتى قالاسىندا كومپانيا كەڭسەسىنىڭ اشىلۋى – تابىستى جانە قارقىندى دامىپ كەلە جاتقان ىنتىماقتاستىقتىڭ ايقىن دالەلى. مەملەكەت باسشىسى قازاقستاندا بيوتەحنولوگيالىق كلاستەر قۇرۋ جۇمىسى بەلسەندى جۇرگىزىلىپ جاتقانىنا نازار اۋداردى. پرەزيدەنتتىڭ پىكىرىنشە، QazBioPharm ۇلتتىق حولدينگىمەن عىلىمي-زەرتتەۋ جانە ءوندىرىس سالاسىندا بىرلەسە جۇمىس ىستەۋ ءۇشىن STADA كومپانياسىنا زور مۇمكىندىك اشىلادى. قاسىم-جومارت توقايەۆ گەرمانيالىق كومپانيانى بىرلەسكەن زەرتتەۋلەر جۇرگىزىپ، ازىرلەمەلەر دايىنداۋعا، ءوندىرىستى ۇيىمداستىرۋعا، سونداي-اق تاجىريبە الماسۋعا جانە مامانداردىڭ بىلىكتىلىگىن ارتتىرۋعا شاقىردى.
كريستوس گالليس ىنتىماقتاستىقتى نىعايتۋعا قىزىعۋشىلىق تانىتىپ، كومپانيانىڭ قازاقستانداعى مەديسينالىق جوبالار مەن باعدارلامالارعا ينۆەستيسيا قۇيۋ مۇمكىندىكتەرىن قاراستىرۋعا دايىن ەكەنىن اتاپ ءوتتى.
ەكونوميكالىق ىنتىماقتاستىقتى ودان ءارى نىعايتۋ، سونىڭ ىشىندە قارجىلىق ساقتاندىرۋ سالاسىندا بىرلەسكەن جوبالاردى ازىرلەۋ، تاجىريبە الماسۋ جانە وقۋ باعدارلامالارىن ۇيىمداستىرۋ مۇمكىندىكتەرى تۋرالى قاسىم-جومارت توقايەۆ Euler Hermes اگەنتتىگىنىڭ باسقارما مۇشەسى ەدنا شونەمەن كەزدەسۋى بارىسىندا تالقىلادى.
مەملەكەت باسشىسى Euler Hermes اگەنتتىگىنىڭ قازاقستان ءۇشىن ماڭىزدى سەرىكتەس ەكەنىنە نازار اۋداردى. كومپانيا كرەديتتى ساقتاندىرۋ ىسىندە جاھاندىق كوشباسشى سانالادى جانە كەشەندى قارجىلىق شەشىمدەر جاسايتىن الەمدەگى ەڭ ءىرى كومپانيالاردىڭ ءبىرى – Allianz Group توبىنىڭ قۇرامىنا كىرەدى.
قاسىم-جومارت توقايەۆقا قازاقستان دامۋ بانكى مەن Helaba بانكى اراسىندا قارجىلىق ىنتىماقتاستىق تۋرالى كەلىسىمگە قول قويىلعانى جونىندە مالىمەت بەرىلدى. اتالعان كەلىسىمگە سايكەس AltynAlmas Reagents كومپانياسىنىڭ سيانيد ناتريي وندىرەتىن حيميالىق زاۋىتىنىڭ قۇرىلىسىنا 100 ميلليون ەۆروعا دەيىن قارجى ءبولۋ قاراستىرىلعان.
