پرەزيدەنت سۋ تاسقىنى كەزىندە ەلىمىزگە كورسەتكەن كومەگى ءۇشىن كورەي كومپانياسىنا العىس ءبىلدىردى.
مەملەكەت باسشىسى Doosan Group كومپانياسىنىڭ ءتوراعاسى چجەونگ ۆون پاك پەن Doosan Enerbility باسقارما ءتوراعاسىنىڭ ورىنباسارى ءون ين چونگتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
كەزدەسۋ باسىندا پرەزيدەنت سۋ تاسقىنى كەزىندە ەلىمىزگە كورسەتكەن كومەگى ءۇشىن كورەي كومپانياسىنا العىس ءبىلدىردى. مەملەكەت باسشىسىنىڭ ايتۋىنشا، وسىنداي قيىن-قىستاۋ جاعدايدا كاسىپكەرلەردىڭ حالىقتى قولداۋى ولاردىڭ الەۋمەتتىك جاۋاپكەرشىلىك دەڭگەيى جوعارى ەكەنىن كورسەتتى.
قاسىم-جومارت توقايەۆقا تۇركىستان وبلىسىندا قۋاتى 1 گۆت بولاتىن بۋ-گاز ەلەكتر ستانسياسىن سالۋ جوباسىنىڭ جۇزەگە اسىرىلۋ بارىسى، سونداي-اق كومپانيانىڭ اتىراۋ وبلىسىندا «قاراباتان» گاز تۋربينالى ەلەكتر ستانسياسىن كەڭەيتۋگە قاتىسۋ پەرسپەكتيۆالارى تۋرالى مالىمەت بەرىلدى.
Doosan Enerbility كومپانياسى Doosan Group قۇرامىنا كىرەدى. بۇل كاسىپورىن اتوم ەلەكتر ستانسيالارىن سالۋعا، جىلۋ ەلەكتر ستانسيالارىن، تۋربينالار مەن گەنەراتورلار، سۋ تۇشىتاتىن قوندىرعىلار وندىرۋگە ماماندانعان. كومپانيادا 5 مىڭنان استام قىزمەتكەر جۇمىس ىستەيدى. 2023 جىلى ءونىم ساتۋ كولەمى 17،5 ميلليارد دوللاردى قۇرادى.