ۇلىبريتانيا قازاقستاندا جۇرگىزىلىپ جاتقان ساياسي رەفورمالاردى وڭ باعالايدى
كەزدەسۋ بارىسىندا ساياسي، ساۋدا-ەكونوميكالىق، ينۆەستيسيالىق جانە گۋمانيتارلىق سالالارداعى ەكىجاقتى ىنتىماقتاستىقتى ودان ءارى نىعايتۋ پەرسپەكتيۆالارى تالقىلاندى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسى ۇلىبريتانيا مينيسترىنە ءىلتيپات بىلدىرە وتىرىپ، ەكى ەل اراسىنداعى ىنتىماقتاستىقتى ودان ءارى نىعايتۋ ءۇشىن ونىڭ بۇگىنگى ساپارىنىڭ ءمانى زور جانە وڭىرلىك اۋقىمداعى ماڭىزدى وقيعا ەكەنىنە نازار اۋداردى.
«ءسىزدىڭ ساپارىڭىز قازاقستان مەن ۇلىبريتانيا اراسىنداعى ءوزارا ىنتىماقتاستىقتى ودان ءارى نىعايتۋعا تىڭ سەرپىن بەرەدى. مەن ءسىزدىڭ جاقىندا سىرتقى ىستەر مينيسترلىگىندە سويلەگەن ءسوزىڭىزدى تىڭدادىم. وندا ۇلىبريتانيانىڭ سىرتقى ساياساتتاعى ۇزاق مەرزىمدى ۇستانىمى قامتىلدى جانە شىن مانىندە، وتە ماڭىزدى ماسەلەلەر ايتىلدى»، – دەدى مەملەكەت باسشىسى.
قاسىم-جومارت توقايەۆ ەكىجاقتى قاتىناستاردىڭ قارقىندى دامىپ كەلە جاتقانىن اتاپ ءوتتى.
«ءبىزدىڭ ىنتىماقتاستىعىمىز، اسىرەسە، ەكونوميكا جانە ساياسي سالالاردا وتە تابىستى دەپ باعا بەرگىم كەلەدى. ءوزارا بايلانىستارىمىزدىڭ وڭ باعىتىن ودان ءارى ىلگەرىلەتۋ ءۇشىن قوسىمشا كۇش-جىگەر جۇمساۋىمىز كەرەك»، – دەدى پرەزيدەنت.
اڭگىمەلەسۋ بارىسىندا پرەزيدەنت قاسىم-جومارت توقايەۆ پرەمەر-مينيستر ريشي سۋناققا سالەمى مەن ىزگى تىلەگىن جولدادى. سونداي-اق ۇلىبريتانيا ۇكىمەتىنىڭ باسشىسىن ەلىمىزگە وزىنە ىڭعايلى كەز كەلگەن ۋاقىتتا ساپارمەن كەلۋگە شاقىردى. بۇل ساپار ەكىجاقتى قاتىناستاردى نىعايتۋعا باعىتتالعان ءبىرقاتار ناقتى ماسەلەنى تالقىلاۋعا جاقسى مۇمكىندىك بەرەتىنىن اتاپ ءوتتى.
ءوز كەزەگىندە دجەيمس كليەۆەرلي استانا مەن لوندون اراسىنداعى قارىم-قاتىناستاردىڭ قارقىندى دامىپ كەلە جاتقانىن جەتكىزدى. ونىڭ ايتۋىنشا، ۇلىبريتانيا قازاقستاندا جۇرگىزىلىپ جاتقان ساياسي رەفورمالاردى وڭ باعالايدى.
«ءسىزدىڭ ەلىڭىز – ايماقتاعى ءبىزدىڭ نەگىزگى ساۋدا سەرىكتەسىمىز. ەكونوميكالىق وسىمگە باعىتتالعان جوسپاردى جۇزەگە اسىرۋ ماقساتىندا بىرلەسىپ جۇمىس ىستەۋ ءۇشىن جاقسى مۇمكىندىك بار ەكەنىن كورىپ وتىرمىز. قازاقستاندا جۇزەگە اسىرىلىپ جاتقان سالىق سالاسىنداعى رەفورمالار باعدارلاماسى ءوزارا ءتيىمدى ەكونوميكالىق قاتىناستاردى نىعايتۋعا ىقپال ەتەدى دەپ ويلايمىن»، – دەدى ۇلىبريتانيا ءمينيسترى.
سونىمەن قاتار كەزدەسۋ بارىسىندا قاسىم-جومارت توقايەۆ پەن دجەيمس كليەۆەرلي وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.