قازاقستان كونفەسسياارالىق جانە ەتنوسارالىق كەلىسىمدى نىعايتۋ باعىتىندا دايەكتى ساياسات جۇرگىزىپ كەلەدى.
پرەزيدەنت قاسىم-جومارت توقايەۆ الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسقانى، سونداي-اق قازاقستاننىڭ بۇل باستاماسىن بەلسەندى قولداعانى ءۇشىن اشكەنازي جانە سەفارد راۆۆيناتتارىنىڭ بەدەلدى باسشىلارىنا العىس ايتتى، دەپ حابارلايدى Almaty-akshamy.kz اقورداعى سىلتەمە جاساپ.
قاسىم-جومارت توقايەۆ ءبىزدىڭ ەلىمىزدى ۇزاق تاريحي كەزەڭدە قالىپتاسقان ءدىني جانە مادەني ءارالۋاندىلىق ەرەكشەلەندىرگەنىن اتاپ ءوتتى.
قازاقستان اۋماعىندا ءىرى الەمدىك جانە ءداستۇرلى دىندەردىڭ، سونىڭ ىشىندە ءيۋدايزمنىڭ رۋحاني داستۇرلەرى توعىسقان. مەملەكەت باسشىسىنىڭ ايتۋىنشا، قازاقستان كونفەسسياارالىق جانە ەتنوسارالىق كەلىسىمدى نىعايتۋ باعىتىندا دايەكتى ساياسات جۇرگىزىپ كەلەدى.
مەملەكەت باسشىسى يزرايل قازاقستاننىڭ تاياۋ شىعىستاعى ماڭىزدى سەرىكتەسى ەكەنىن اتاپ ءوتتى، سونداي-اق ساۋدا-ەكونوميكالىق ىس-ارەكەتتەر جاندانىپ، مادەني-رۋحاني بايلانىستار دايەكتى تۇردە نىعايىپ كەلە جاتقانىن ايتتى.
داۆيد لاۋ مەن يسحاك يوسيف قازاقستاننىڭ كونفەسسياارالىق ديالوگتى نىعايتۋعا بەيىلدى ەكەنىنە، ءاردايىم ءدىني سەنىم بوستاندىعىن قولدايتىنىنا نازار اۋدارىپ، بۇل سالادا وزگە مەملەكەتتەرگە ۇلگى بولاتىنىن جەتكىزدى.