قاسىم-جومارت توقايەۆ استاناعا رەسمي ساپارمەن كەلگەن ازەربايجاننىڭ سىرتقى ىستەر ءمينيسترى دجەيحۋن بايراموۆپەن كەزدەسۋ وتكىزدى.
پرەزيدەنت مەيمانعا ءىلتيپات بىلدىرە وتىرىپ، سان قىرلى مەملەكەتارالىق بايلانىستى ودان ءارى نىعايتۋ تۇرعىسىنان بۇل كەزدەسۋدىڭ ماڭىزىن اتاپ ءوتتى، دەپ حابارلايدى aqshamnews.kz اقوردانىڭ رەسمي سايتىنا سىلتەمە جاساپ.
– ءسىزدىڭ ساپارىڭىزدىڭ باۋىرلاس ازەربايجان ەلىمەن ىنتىماقتاستىعىمىزدى ودان ءارى ىلگەرىلەتۋ تۇرعىسىنان ءمانى زور. ءبىز ءۇشىن ازەربايجانمەن قارىم-قاتىناس ەرەكشە ماڭىزعا يە. ءبىز ءسىزدىڭ ەلىڭىزدى سەنىمدى ستراتەگيالىق سەرىكتەس جانە وداقتاس رەتىندە قاراستىرامىز، – دەدى پرەزيدەنت.
ءوز كەزەگىندە ازەربايجاننىڭ سىرتقى ىستەر ءمينيسترى ءداستۇرلى تۇردە قوناقجايلىق تانىتقانى ءۇشىن ريزاشىلىعىن ءبىلدىرىپ، ەكىجاقتى قارىم-قاتىناستىڭ قارقىندى دامىپ كەلە جاتقانىنا توقتالدى.
دجەيحۋن بايراموۆ ورايلى ءساتتى پايدالانا وتىرىپ، ازەربايجاندىق اۋە جەلىسىنە تيەسىلى ۇشاقتىڭ اقتاۋداعى اپاتى كەزىندە جەدەل كومەك كورسەتكەنى ءۇشىن قازاقستان تاراپىنا پرەزيدەنت يلحام الييەۆ پەن ازەربايجان حالقىنىڭ اتىنان العىس ايتتى.
كەزدەسۋدە اۋقىمدى ستراتەگيالىق جوبالاردى جۇزەگە اسىرۋ، سونىڭ ىشىندە كاسپيي تەڭىزىنىڭ تابانى ارقىلى تالشىقتى-وپتيكالىق بايلانىس پەن سۋاستى ەلەكتر جەلىسىن تارتۋ ماسەلەلەرى تالقىلاندى.
سونىمەن قاتار ساۋدا، ينۆەستيسيا، سيفرلاندىرۋ، كولىك-ترانزيت سالالارىنداعى ءوزارا ىقپالداستىقتى ودان ءارى جانداندىرۋ پەرسپەكتيۆاسى قاراستىرىلدى.