مەملەكەتتەر باسشىلارى ساۋدا-ەكونوميكا، ينۆەستيسيا، اۋىل شارۋاشىلىعى جانە كولىك-ترانزيت سالالارىنداعى ىنتىماقتاستىقتى نىعايتۋ ماسەلەسىن جان-جاقتى تالقىلادى. سونداي-اق مادەني-گۋمانيتارلىق ىقپالداستىققا نازار اۋداردى. تاراپتار ايماقتىق جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
قاسىم-جومارت توقايەۆ:
– ءسىزدى مەملەكەتتىك ساپارىڭىز اياسىندا قازاقستاندا قارسى الۋ – مەن ءۇشىن ۇلكەن مارتەبە. بۇل – ەلدەرىمىزدىڭ اراسىنداعى ستراتەگيالىق سەرىكتەستىك پەن وداقتاستىق قاتىناستاردى ودان ءارى دامىتۋ تۇرعىسىنان وتە ماڭىزدى وقيعا. قازاقستان مەن ءازىربايجان تەك دوستاس ەلدەر ەمەس، سونداي-اق باۋىرلاس حالىقتار. سوندىقتان ءسىزدىڭ ەلىڭىزبەن سان قىرلى ىنتىماقتاستىقتى وركەندەتۋگە باسا ءمان بەرەمىز. قازىرگى كەزدە ءازىربايجان ءسىزدىڭ قۋاتتى كوشباسشىلىعىڭىزبەن حالىقارالىق ارەناداعى ابىروي-بەدەلىن ەلەۋلى تۇردە ارتتىردى، ءوز وڭىرىندە ىقپالدى مەملەكەت رەتىندە وتە ماڭىزدى ءرول اتقارادى. ءبىز ءۇشىن ازىربايجانمەن ساۋدا-ەكونوميكالىق ىنتىماقتاستىقتى جانە ساياسي سەرىكتەستىكتى نىعايتۋ – اسا وزەكتى مىندەت، – دەدى مەملەكەت باسشىسى.
يلحام الييەۆ:
– بۇگىندە قازاقستان دامۋدىڭ جوعارى دەڭگەيىن كورسەتىپ وتىر. ەلىڭىزدەگى قوعامدىق-ساياسي جاعداي تۇراقتى، ەكونوميكالىق دامۋ قالىپتى. ءسىز جۇرگىزىپ جاتقان رەفورمالاردى زور قىزىعۋشىلىقپەن باقىلاپ وتىرمىز. ەلىڭىزدى جاڭعىرتۋ مەن الەۋەتىن ارتتىرۋ جولىنداعى باعدارىڭىزدى تولىق قولدايمىز. ەكىجاقتى قارىم-قاتىناستىڭ ستراتەگيالىق، وداقتاستىق سيپات العانىن اتاپ ءوتتىڭىز. ءبىز بارلىق باعىتتاعى ىقپالداستىقتى نىعايتۋعا نيەتتىمىز. بۇگىنگى كەلىسسوز، سونداي-اق جوعارى مەملەكەتارالىق كەڭەس وتىرىسى بارىسىندا اۋقىمدى كۇن ءتارتىبىن تاعى دا پىسىقتاپ، ءوزارا سەرىكتەستىكتىڭ الداعى قادامدارىن ايقىندايمىز، – دەدى ازەربايجان پرەزيدەنتى.
