كەزدەسۋ بارىسىندا ءدىن سالاسىنداعى مەملەكەتتىك ساياسات ماسەلەلەرىنە ءسوز بولدى.
كەزدەسۋدە قاسىم-جومارت توقايەۆ پراۆوسلاۆ شىركەۋىنىڭ قازاقستاندا بىرلىك پەن كەلىسىمدى نىعايتۋعا قوسقان ۇلەسىن جوعارى باعالاپ، ءدىن سالاسىنداعى مەملەكەتتىك ساياسات ماسەلەلەرىنە توقتالدى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسى قازاقستان ميتروپوليتتىك ايماعىنىڭ ەتنوسارالىق جانە كونفەسسياارالىق ديالوگتى دامىتۋ، ادامگەرشىلىك قۇندىلىقتاردى ىلگەرىلەتۋ جولىندا اۋقىمدى جۇمىس اتقارىپ جاتقانىن اتاپ ءوتتى.
پرەزيدەنت قىركۇيەك ايىندا الەمدىك جانە ءداستۇرلى دىندەر كوشباسشىلارىنىڭ VII سەزى وتەتىنىن ايتتى. ونىڭ باستى تاقىرىبى – ادامزاتتىڭ پاندەميادان كەيىنگى كەزەڭدەگى رۋحاني جانە الەۋمەتتىك دامۋىندا ءدىني كوشباسشىلاردىڭ اتقاراتىن ءرولى. قاسىم-جومارت توقايەۆ پاتريارح كيريللدىڭ اتالعان فورۋمعا قاتىسۋى جاھاندىق ءدىنارالىق جانە وركەنيەتارالىق ديالوگقا تىڭ سەرپىن بەرەتىنىنە سەنىم ءبىلدىردى.
ءوز كەزەگىندە ميتروپوليت الەكساندر مەملەكەت باسشىسىنا كەزدەسۋگە مۇمكىندىك بەرگەنى ءۇشىن العىس ءبىلدىرىپ، قازاقستان حالقىنىڭ يگىلىگى جولىنداعى جاڭعىرۋعا باعىتتالعان جاسامپاز رەفورمالاردى قولدايتىنىن جەتكىزدى.