ۇكىمەت تاراپىنان قانداي شارالار قولعا الىنادى؟
دەنساۋلىق ساقتاۋ ءمينيسترى اجار عينيات ءوز سوزىندە ەلىمىزدە ماۋسىم ايىنىڭ ورتاسىنان باستاپ كوروناۆيرۋس ينفەكسياسىن جۇقتىرعاندار سانىنىڭ ارتقانىن اتاپ ءوتتى، دەپ حابارلايدى Almaty-akshamy.kz
پرەمەر-مينيستردىڭ ورىنباسارى ەرالى توعجانوۆتىڭ توراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋس ينفەكسياسى تارالۋىنىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسى ءوتتى. كوميسسيا جۇمىسىنا ورتالىق مەملەكەتتىك ورگانداردىڭ وكىلدەرى، وبلىس اكىمدەرى جانە «اتامەكەن» ۇكپ قىزمەتكەرلەرى قاتىستى.
وتكەن اپتامەن سالىستارعاندا، ۆيرۋس جۇقتىرۋ جاعدايلارى 2،9 ەسە ارتقان، ناۋقاستاردىڭ 80%-نا جۋىعى – ىندەتكە قارسى ەكپە الماعاندار جانە سوڭعى ەكپەدەن كەيىن 6 اي ءوتىپ كەتكەن ادامدار. ەلدەگى COVID-19 كورسەتكىشتەرىنىڭ ارتۋىن ەسكەرە وتىرىپ، ق ر اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا وڭىرلەر ەپيدەميولوگيالىق قاۋىپ-قاتەردىڭ سارى ايماعىنا كوشكەن جاعدايدا تومەندەگى قوسىمشا شارالاردى قابىلداۋ كەرەكتىگى تۋرالى شەشىم قابىلدادى: ناۋقاسپەن تىعىز قارىم-قاتىناستا بولعانداردى قاشىقتان جۇمىس ىستەۋ فورماتىنا كوشىرۋ؛ COVID-19-عا قارسى ەكپە سالدىرۋعا بولمايتىن قىزمەتكەرلەر مەن جۇكتى ايەلدەردى قاشىقتان جۇمىس ىستەۋ فورماتىنا اۋىستىرۋ؛ جابىق جەرلەر مەن قوعامدىق كولىكتە مىندەتتى تۇردە ماسكا تاعۋ؛ 10-نان استام ادام قاتىساتىن جينالىستاردى ونلاين فورماتتا وتكىزۋدى ۇسىنۋ.
سونداي-اق ايماقتىڭ ەپيدەميولوگيالىق احۋالىنا قاراماستان، اۋەدە، تج كولىكتەرى مەن حالىقارالىق اۆتوبۋستاردا ماسكا تاعۋ ۇسىنىلادى. وتىرىس سوڭىندا ە. توعجانوۆ وبلىس اكىمدەرىنە كوروناۆيرۋس ينفەكسياسىنا قارسى ەگۋ ناۋقانىن كۇشەيتۋدى، سىرقاتتانعاندار كوبەيگەن جاعدايدا كادرلارمەن، دارى-دارمەك قورى جانە توسەك ورىندارىمەن قامتاماسىز ەتۋدى ەرەكشە باقىلاۋعا الۋدى تاپسىردى. سونداي-اق حالىق اراسىندا ساپالى ءتۇسىندىرۋ جۇمىستارىن كۇشەيتۋ قاجەتتىگىن ەسكەرتتى.