مەملەكەت باسشىسى ادام قۇقىقتارى جونىندەگى ۋاكىل ارتۋر لاستايەۆتى قابىلدادى.
ۋاكىل بيىلعى 5 ايدا اتقارعان جۇمىستارىنىڭ قورىتىندىسى تۋرالى باياندادى. ومبۋدسمەن كەڭسەسى مەن ونىڭ وڭىرلەردەگى وكىلدىكتەرى وسى ۋاقىت ارالىعىندا ازاماتتاردىڭ 2 318 ءوتىنىشىن قاراعان.
ارتۋر لاستايەۆتىڭ ايتۋىنشا، جەرگىلىكتى جەردەگى جۇمىستى كۇشەيتۋ ءۇشىن ۇلتتىق پريەۆەنتيۆتى مەحانيزم مۇشەلەرىنىڭ قۇرامى جاڭارعان. بالالارعا ارنالعان مەكەمەلەردەگى قاتىگەزدىك ارەكەتتەردىڭ الدىن الۋ ماسەلەسىن ەرەكشە نازاردا ۇستايدى. اتاپ ايتقاندا، ۋاكىل وسىنداي مەكەمەلەرگە 213 رەت بارىپ، 800-دەن استام ۇسىنىم جاساعان. ازاپتاۋ فاكتىلەرىنە قاتىستى تەرگەۋ امالدارى جۇرگىزىلەدى. قۇقىق قورعاۋ ورگاندارىنا ءبىرقاتار ارنايى ۇسىنىم بەرىلگەن.
قاسىم-جومارت توقايەۆ ءتيىستى مەملەكەتتىك ورگاندارمەن بىرلەسىپ، ازاماتتاردىڭ قۇقىقتارىن ءتيىمدى قورعاۋدى قامتاماسىز ەتۋ ماڭىزدى ەكەنىن ايتتى.