"مەمگە اينالعان سوزدەر". دەپۋتات وڭىرلەردەگى ماسەلەلەرگە قاتىستى وتكىر سىن ايتتى

ءماجىلىس دەپۋتاتى، "AMANAT" پارتياسى فراكسياسىنىڭ جەتەكشىسى ەلنۇر بەيسەنبايەۆ ۇكىمەت پەن اتقارۋشى ورگانداردىڭ جۇمىسىنا، حالىقپەن كوممۋنيكاسيا ساپاسىنا جانە وڭىرلەردەگى جۇيەلى ماسەلەلەرگە قاتىستى ءبىرقاتار وتكىر سىن ايتتى. ول بۇل تۋرالى فراكسيانىڭ كەڭەيتىلگەن وتىرىسىندا سويلەگەن سوزىندە مالىمدەدى، - دەپ حابارلايدى aqshamnews.kz ءتىلشىسى. 

دەپۋتاتتىڭ ايتۋىنشا، جازدا "AMANAT" فراكسياسىنىڭ دەپۋتاتتارى ەلىمىزدىڭ بارلىق وڭىرىندە 543 ەلدى مەكەندى ارالاپ، مىڭنان اسا كەزدەسۋ وتكىزگەن. سول ساپارلار بارىسىندا حالىقتى ەڭ كوپ تولعاندىراتىن نەگىزگى پروبلەمالار انىقتالعان.

"بۇگىن دەپۋتاتتار قويعان 40-تان استام سۇراق – ەلدەگى كۇردەلى ماسەلەلەردىڭ شاعىن عانا بولىگى. ءار ماسەلەنىڭ ارتىندا مىڭداعان تۇيتكىل مەن جىلدار بويى شەشىلمەي كەلە جاتقان پروبلەمالار تۇر"، – دەدى بەيسەنبايەۆ.

ونىڭ ايتۋىنشا، ۇكىمەتتەن كەلگەن جاۋاپتار دا كوڭىل كونشىتپەيدى:

• 46 پايىزى – تەك تۇسىندىرمە سيپاتىنداعى جاۋاپ؛

• 20 پايىزى – "ورىنداۋ ساتىسىندا" دەپ كورسەتىلگەن؛

• 13 پايىزى – مۇلدە شەشىلمەگەن؛

• 5 پايىزى – جاۋاپسىز قالعان.

"بۇل ستاتيستيكا ۇكىمەتتىڭ سۇراقتاردىڭ جارتىسىنان استامى بويىنشا ناقتى شەشىم قابىلداماعانىن، ال ءار بەسىنشى ءوتىنىشتىڭ بيۋروكراتيالىق سوزبالاڭعا ۇشىراعانىن كورسەتەدى"، – دەدى دەپۋتات.

ينفلياسيا، اۋىلداعى تابىس جانە اۋىل اكىمدەرىنىڭ وكىلەتتىگى

ءبىرىنشى كەزەكتە بەيسەنبايەۆ ينفلياسيا مەن قىمباتشىلىق ماسەلەسىن كوتەردى. ونىڭ سوزىنشە، بۇل – جاي عانا ەكونوميكالىق كورسەتكىش ەمەس، حالىقتىڭ ءومىر ساپاسىنا تىكەلەي اسەر ەتىپ وتىرعان فاكتور.

اۋىل تۇرعىندارىنىڭ باسىم بولىگى تابىسىنىڭ جارتىسىنان كوبىن ازىق-تۇلىككە جۇمسايدى.

"باعانىڭ كۇن سايىن ءوسۋى وتباسىلاردىڭ بيۋدجەتىن قىسقارتىپ، ازاماتتاردىڭ مۇمكىندىگىن شەكتەپ وتىر"، – دەدى ول.

ەكىنشى ماسەلە – اۋىل مەن قالا تۇرعىندارىنىڭ تابىسىنداعى الشاقتىق.
دەپۋتاتتىڭ كەلتىرگەن دەرەگىنە سۇيەنسەك، 85 مىڭ تەڭگە كولەمىندەگى ەڭ تومەنگى جالاقى الاتىن ءبىر ميلليوننان استام ازاماتتىڭ كوبى – اۋىلدا تۇراتىندار.

"ياعني تابىسى دا، جالاقىسى دا ەڭ تومەن ادامدار – اۋىل تۇرعىندارى. بۇل وتە قيىن جاعداي"، – دەدى ول.

ءۇشىنشى باعىت رەتىندە بەيسەنبايەۆ جەرگىلىكتى ءوزىن-وزى باسقارۋدى كۇشەيتۋ، اۋىل اكىمدەرىنىڭ جاۋاپكەرشىلىگى مەن قۇزىرەتىن ارتتىرۋ قاجەتىن اتاپ ءوتتى. پرەزيدەنت اكىمدەردىڭ وكىلەتتىگىن كەڭەيتىپ، جەرگىلىكتى بيۋدجەتكە سالىقتىڭ ءبىر بولىگىن قالدىرۋ تۋرالى ناقتى تاپسىرما بەرگەنىن ەسكە سالدى.

"بۇل جاي ۇسىنىس ەمەس، باسقارۋ جۇيەسىنىڭ تيىمدىلىگىن ارتتىرۋعا باعىتتالعان ساياسي شەشىم. اۋىل اكىمدەرىنە لايىقتى قۇزىرەت بەرۋ – ۇلتتىق باسقارۋ جۇيەسىن جاڭعىرتۋدىڭ باستى شارتى"، – دەدى ول.

جىلدار بويى بىتپەيتىن قۇرىلىس جانە "قۇمعا سىڭگەن" بيۋدجەت

دەپۋتات ەرەكشە توقتالعان تاعى ءبىر ماسەلە – اياقتالماعان جوبالار مەن سوزبالاڭعا تۇسكەن قۇرىلىس.

ونىڭ ايتۋىنشا، مەملەكەت جوبالاۋ-سمەتالىق قۇجاتتاماعا جانە دايىندىق جۇمىستارىنا قىرۋار قاراجات جۇمسايدى، الايدا جوبالاردىڭ ءبىر بولىگى جىلدار بويى ىسكە اسپاي، قاعاز كۇيىندە قالىپ قويادى.

بەيسەنبايەۆ كەلتىرگەن دەرەكتەر:

• ءار بەسىنشى جسق – مەرزىمى ءوتىپ كەتكەن، دايىندالعانىنا ءۇش جىلدان اسقان قۇجات؛

• الەۋمەتتىك نىسانداردىڭ ءار ەكىنشىسىندە – قاراجاتتى تولىق يگەرمەۋ فاكتىلەرى بار؛

• ءار ءتورتىنشى نىسان – ۇزاققا سوزىلعان قۇرىلىسقا اينالادى.

مۇنىڭ ءبارى، دەپۋتاتتىڭ پىكىرىنشە، قوعامنىڭ اشۋ-ىزاسىن تۋدىرىپ، باق-تا ءجيى سىننىڭ نىساناسىنا اينالىپ وتىر.

سونىمەن قاتار، ەلدى مەكەندەردەگى سۋ، كارىز، ەلەكتر جەلىلەرىنىڭ توزىعى جەتكەنى دە ايتىلدى:
كەيبىر وڭىرلەردە ەلەكتروسەتىلەردىڭ توزۋ دەڭگەيى 85 پايىزعا جەتكەن. ماڭعىستاۋداعى كارىز-قونىستانۋ قۇرىلىستارى، اتىراۋداعى گاز قۇبىرلارى، بايقوڭىرداعى سۋ قۇبىرى سەكىلدى ءىرى نىساندار جوبالاۋ مەن قارجىلاندىرۋداعى كىدىرىستەرگە بايلانىستى ۋاقىتىندا ىسكە قوسىلماي وتىر.

"ناتيجەسىندە ءبىز جىل سايىن دامۋعا ەمەس، "تەسىكتەردى جاماۋعا" اقشا جۇمسايمىز"، – دەدى بەيسەنبايەۆ.

تەمىرجول جانە جولداعى ءقاۋىپ

فراكسيا دەپۋتاتى جۇك تەمىرجول تاسىمالىنداعى داعدارىستى دا اتاپ ءوتتى. ونىڭ ايتۋىنشا، ۇلتتىق وپەراتور ترانزيتتىك جۇكتەرگە باسىمدىق بەرىپ، وتاندىق وندىرۋشىلەردىڭ مۇددەسىن ەكىنشى ورىنعا ىسىرىپ وتىر.

ۋاقىتشا تىيىمدار مەن شەكتەۋلەر سالدارىنان وتاندىق تاۋارلار شەتەلدىك نارىقتارعا كەش جەتىپ، ءبىزدىڭ وندىرۋشىلەردەن بوساعان ورىنداردى باسەكەلەستەر تەز باسىپ الۋدا.

سونداي-اق، بەيسەنبايەۆ ءپراۆورۋلدى مينيۆەندەر – Toyota Alphard جانە Estima توڭىرەگىندەگى احۋالعا توقتالدى.

كەيىنگى10 ايدا جول-كولىك وقيعالارى 27 پايىزعا وسكەنى اتاپ ءوتىلدى. تاكسي قىزمەتىندە ءپراۆورۋلدى كولىكتەردى پايدالانۋعا زاڭمەن تىيىم سالىنعانىنا قاراماستان، كولەڭكەلى تاسىمال ءالى دە جالعاسۋدا، ال اگرەگاتورلار ءتيىستى باقىلاۋ جاساپ وتىرعان جوق.

"بارلىق كوممەرسيالىق جانە قالاارالىق جولاۋشىلار تاسىمالىندا ءپراۆورۋلدى كولىكتەردى پايدالانۋعا تولىق ءارى بۇلجىماس تىيىم ەنگىزۋ قاجەت"، – دەدى ول.

"قۇلاق اساتىن ۇكىمەت" جانە شەنەۋنىكتەردىڭ سوزدەرى مەمگە اينالدى

بەيسەنبايەۆ ۇكىمەت مۇشەلەرىنىڭ قوعاممەن ديالوگقا دايىندىعى مەن ەتيكا ماسەلەسىن دە سىنعا الدى.

سالىق كودەكسىن قابىلداۋ كەزىندەگى جاعدايدى مىسال كەلتىرىپ، پارلامەنتتىڭ ەسكەرتۋلەرىن ەلەمەۋ كەيىن پرەزيدەنتتىڭ ارالاسۋى ارقىلى عانا كەيبىر نورمالاردى "توقتاتۋعا" اكەلگەنىن ايتتى.

"ۇكىمەت تاعى دا پرەزيدەنتتىڭ ارتىنا تىعىلىپ، ءوز قاتەلىكتەرىن مەملەكەت باسشىسىنىڭ شەشىمىمەن بۇركەمەلەپ وتىر"، – دەدى ول.

سونىمەن قاتار، ۆيسە-مينيستردىڭ جاڭا جىلدىق داستارقان قۇنى تۋرالى "ءاميان مەن قالاۋىنا قاراي" دەگەن جاۋابى، وبلىس اكىمىنىڭ ورىنباسارىنىڭ مۇگەدەكتىگى بار ازاماتتاردى قورلاي سويلەۋى، قورعانىس ءمينيسترىنىڭ اسكەردەگى سۋيسيدكە قاتىستى يرونيالىق پىكىرى – "مەمگە اينالعان"، حالىقتىڭ اشۋىن تۋدىرعان مىسالدار رەتىندە اتالدى.

اسكەردەگى الىمجەتتىك پەن سۋيسيدكە بايلانىستى اۋىل تۇرعىندارىنىڭ ءوزى الاڭداپ وتىرعانىن ايتقان دەپۋتات:

"كەيىنگى 3،5 جىلدا اسكەري قىزمەتتە 280-نەن استام ادامنىڭ قازاسى تىركەلگەن. بۇل – دابىل قاعاتىن ماسەلە"، – دەدى.

ءبىلىم بەرۋ جۇيەسى جانە Tesla وقۋ ورتالىعى داۋى

استاناداعى Tesla وقۋ ورتالىعى توڭىرەگىندەگى جاعداي ءبىلىم بەرۋ سالاسىنداعى جۇيەلىك پروبلەمالاردى ايقىن كورسەتكەنىن ايتتى.

اتا-انالار ادال تاپقان 1 ملرد تەڭگەسىنەن ايىرىلعان. بالالار مەكتەپكە بارىپ جۇرگەنىمەن، وقۋ باعدارلاماسىن قايتا ءتۇسىنۋ ءۇشىن قوسىمشا كۋرستارعا جاپپاي بارۋعا ءماجبۇر.

سوڭعى جىلدارى مەكتەپ باعدارلاماسىن تۇسىندىرەتىن كۋرستار مەن رەپەتيتورلىققا سۇرانىس 25 پايىزعا وسكەن.

"قوسىمشا ساباق بۇگىن قاجەتتىلىككە اينالدى. اتا-انالار بالالارىن ۇبت-عا دايىنداۋ ءۇشىن جاپپاي وقۋ ورتالىقتارىنا جۇگىنىپ جاتىر. بۇل – پارادوكس"، – دەدى بەيسەنبايەۆ.

"حالىق ءمينيستردى ەمەس، الدىمەن دەپۋتاتتى ىزدەيدى"

ءسوزىنىڭ اياعىندا دەپۋتات قوعامداعى سەنىمگە توقتالدى.

"بۇگىندە قاراپايىم حالىق كوبىنە ءمينيستردى نەمەسە اكىمدى ەمەس، الدىمەن دەپۋتاتتى ىزدەيدى. ويتكەنى دەپۋتات – حالىقتىڭ تىكەلەي سەنىم مانداتىنا يە تۇلعا"، – دەدى ول.

ونىڭ پىكىرىنشە، سالالىق ۆەدومستۆولاردىڭ باسشىلارى قاراپايىم ازاماتتاردىڭ سۇراعىنا ءۇستىرت، فورمالدى جاۋاپ بەرىپ، كوتەرىلگەن ماسەلەگە جەتكىلىكتى ءمان بەرمەي وتىر.

"سەسسيا باستالعالى بەرى "AMANAT" فراكسياسى ۇكىمەتكە 120-دان استام دەپۋتاتتىق ساۋال جولدادى. ءبىراق ولاردىڭ شامامەن 60 پايىزى – مازمۇنسىز، فورمالدى "وتپيسكا" سيپاتىنداعى جاۋاپتار"، – دەدى بەيسەنبايەۆ.

وسىعان وراي، ول پرەزيدەنتتىڭ "كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت" قاعيداتى اتقارۋشى بيلىك تاراپىنان جەتكىلىكتى قولداۋ تاپپاي وتىرعانىن اتاپ ءوتتى.

"قۇلاق اساتىن ۇكىمەت دەگەنىمىز – ماسەلەنى تىڭداپ قانا قويماي، وعان ناقتى، جۇيەلى، ۋاقىتىلى جانە ءتيىمدى شەشىم ۇسىنا الاتىن ينستيتۋت. پارلامەنت دەپۋتاتتارى كوتەرگەن ءار ساۋال – جاي قاعاز ەمەس، ميلليونداعان ادامنىڭ ومىرىنە تىكەلەي اسەر ەتەتىن ماڭىزدى ماسەلە. سوندىقتان مەملەكەتتىك ورگاندار فورماليزمنەن ارىلىپ، ناقتى ناتيجەگە باعىتتالعان ءىس-قيمىلعا كوشۋگە ءتيىس"، – دەپ تۇيىندەدى ەلنۇر بەيسەنبايەۆ.