كەشە دەپۋتات ماقسات تولىقبايدىڭ قاراساي اۋدانىنداعى مەكتەپتىڭ جەكە قولعا ءوتىپ كەتكەنى تۋرالى ماسەلە كوتەرگەنىن حابارلاعانبىز.
جۋرناليست دياس نۇراقىن مەكتەپتى قاي اكىم ساتىپ جىبەرگەنى تۋرالى قۇجاتتاردى جاريالادى، دەپ حابارلايدى Almaty-akshamy.kz
الماتى وبلىسى قاراساي اۋدانى، شالقار اۋىلىنداعى لومونوسوۆ اتىنداعى 250 ورىنعا ارنالعان، جالپى اۋدانى 1585 شارشى مەتر بولاتىن عيمارات 15 ملن 224 مىڭ تەڭگەگە ساتىلعان.
«الماتى وبلىسىنداعى 15 ميلليون تەڭگەگە ساتىلعان مەكتەپتى كىم ساتقانى، كىمنىڭ ساتىپ العانى بارىڭىزگە قىزىق شىعار، ءيا؟ وندا تومەندەگى قۇجاتتارعا ءۇڭىلىپ كورىڭىز. اۋماعى 75 سوتىق، جالپى اۋدانى 1585 شارشى مەتر بولاتىن داڭعاراداي عيمارات راسىمەن نەبارى 15 ملن 224 مىڭ تەڭگەگە ساتىلىپتى. ساتىپ الۋشىنىڭ ارمانى جوق شىعار. مىناداي اقشاعا تاۋىق قورا تۇرعىزا المايسىڭ عوي مىنا زاماندا. اۋدان اكىمى ساتىلسىن دەگەن قاۋلى شىعارىپ بەرگەن ەكەن. ءبىلىم ءبولىمىنىڭ باسشىلارى كوميسسيا قۇرامىندا بولىپتى. ماقسات تولىقباي كوتەرگەن ماسەلەنى تەرەڭدەپ قازساڭ، تالاي دوكەيدىڭ ارتى اشىلايىن دەپ تۇر. ەكى ايدىڭ ىشىندە مەكتەپ مەملەكەت مەنشىگىنە وتەدى دەپ سەنەمىن!» - دەپ جازدى دياس نۇراقىن ءوزىنىڭ فب پاراقشاسىندا.
جۋرناليست جاريالاعان قۇجاتتاردا تولەمشىنىڭ ءاتى-جونى شەرحان الىبەك ۇلى دەپ كورسەتىلەدى. مەملەكەتتىك نىساندى قاراساي تۇرعىن ءۇي قۇرىلىسى دەگەن كومپانيا ساتىپ العان. شەرحان الىبەك ۇلى دەگەن ازاماتتىڭ جسن-ىنا قاراعاندا، ول - 1998 جىلى تۋعان ازامات.
«قاراساي تۇرعىن ءۇي قۇرىلىسى جشس-نىڭ تەڭگەرىمىندە تۇرعان قاراساي اۋدانى، شالقار اۋىلى، اباي كوشەسى، 9 ءۇي مەكەنجايىندا بوس تۇرعان عيماراتتى جانە الاڭى 0،7500 گا بولاتىن جەر ۋچاسكەسىن ساتۋ ماسەلەسى زاڭدا بەلگىلەنگەن تارتىپكە سايكەس ساتىلۋعا كەلىسىلسىن»، - دەلىنگەن قاراساي اۋدانى اكىمى مىندەتىن اتقارۋشى ج.تاجييەۆ شىعارعان 2018 جىلعى قاۋلىدا.
قاۋلىنىڭ جۇزەگە اسىرىلۋىنا اكىمنىڭ ورىنباسارى ن.ساتۋبەكوۆ دەگەن شەنەۋنىك جاۋاپتى بولعان.
عيماراتتى كاسىپكەرگە وتكىزىپ بەرۋگە كەلىسكەن جانە قابىلداعان كوميسسيانىڭ قۇرامىندا قاراساي اۋدانى ءبىلىم ءبولىمىنىڭ باسشىسى گ.ت. تاكيموۆا، وسى ءبولىمنىڭ باس ەسەپشىسى گ.س. شالاپانوۆا مەن قاراساي تۇرعىن ءۇي قۇرىلىسى كومپانياسىنىڭ ديرەكتورى ب.ب. بالتابەكوۆ بولعان.