بۇگىنگى ۇكىمەت وتىرىسىندا پرەمەر-مينيستر ءاليحان سمايىلوۆ كەشە پەتروپاۆل قالاسىنداعى №4-مەكتەپتە ورىن العان وقىس وقيعاعا بايلانىستى ىشكى ىستەر مينيسترلىگى وكىلىنىڭ ەسەبىن تىڭدادى.
ۇكىمەت باسشىسى بۇل وتە ءقاۋىپتى جاعدايدىڭ ەل ىشىندە ۇلكەن الاڭداۋشىلىق تۋدىرعانىن اتاپ ءوتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
«بالالاردىڭ قاۋىپسىزدىگىنە الاڭدامايتىن وتباسى جوق. ەندى مەكتەپتىڭ ىشىندە دە ءقاۋىپ بار ەكەنىنە كۋا بولىپ وتىرمىز»، - دەگەن ول جاۋاپتى ۆەدومستۆو باسشىلارىنا ءبىرقاتار تاپسىرمالار بەردى.
اتاپ ايتقاندا، بۇل ماسەلەنى قايتا زەردەلەپ، وقۋ ورىندارىنا تەكسەرۋ جۇرگىزۋ قاجەتتىگىنە توقتالدى.
«بەينەباقىلاۋ كامەرالارىنىڭ سانىن كوبەيتىپ، مەكتەپكە كىرەبەرىس جەرلەردە باقىلاۋدى كۇشەيتۋ ماسەلەسىن قاراۋ كەرەك. وقۋ-اعارتۋ مينيسترلىگى ىشكى ىستەر جانە توتەنشە جاعدايلار مينيسترلىگىمەن بىرلەسىپ، «قاۋىپسىزدىك ساباقتارىن» ازىرلەۋى قاجەت. بالالار ءارتۇرلى جاعدايدا وزدەرىن قالاي ۇستاۋى كەرەكتىگىن ناقتى ءبىلۋى ءتيىس»، - دەدى ءا.سمايىلوۆ.