وقۋلىقتاردى ءبىلىم بەرۋ ۇيىمدارىنا جونەلتۋ تولىق كولەمدە، ياعني 100 پايىزعا ورىندالدى.
مۇنداي دەرەكتى ق ر وقۋ-اعارتۋ مينيسترلىگىنىڭ رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى كەلتىردى، دەپ حابارلايدى aqshamnews.kz.
وتىنىمدەردى قالىپتاستىرۋ جانە ولاردىڭ ساتىپ الۋىن قارجىلاندىرۋ بۇرىنعىداي جەرگىلىكتى اتقارۋشى ورگانداردىڭ ەسەبىنەن جۇزەگە اسىرىلادى.
جاڭا وقۋ جىلىنا وراي مەكتەپتەر قاجەتتى وقۋلىقتارمەن جانە وقۋ-ادىستەمەلىك كەشەندەرمەن تولىق قامتاماسىز ەتىلدى. اتاپ ايتقاندا، 7، 8، 10 جانە 11-سىنىپتارعا ارنالعان قايتا باسىلعان وقۋلىقتار، سونداي-اق باستاۋىش بۋىنعا ارنالعان جاڭا باسىلىمدار ءبىلىم بەرۋ ۇيىمدارىنا جەتكىزىلدى.
تومەنگى سىنىپتاردىڭ وقۋ مازمۇنىن جاڭارتۋعا ەرەكشە كوڭىل بولىنۋدە. وسى ورايدا 4-سىنىپقا ارنالعان «ورىس ءتىلى» (قازاق تىلىندە وقىتاتىن مەكتەپتەر ءۇشىن)، شەت تىلدەرى (اعىلشىن، نەمىس، فرانسۋز)، «ەڭبەككە باۋلۋ»، «بەينەلەۋ ونەرى»، «سيفرلىق ساۋاتتىلىق» جانە «جاراتىلىستانۋ» (قازاق جانە ورىس تىلدەرىندە) پاندەرىنەن جاڭا وقۋلىقتار ازىرلەندى. 3-سىنىپتار ءۇشىن ۇيعىر جانە وزبەك تىلدەرىندە وقۋلىقتار جارىق كوردى.
ەرەكشە ءبىلىم بەرۋ قاجەتتىلىكتەرى بار بالالاردى وقۋلىقتارمەن قامتاماسىز ەتۋ بويىنشا دا جۇمىس جۇرگىزىلدى. كورۋ قابىلەتى بۇزىلعان جانە ناشار كورەتىن وقۋشىلارعا ارنالعان ارنايى باسىلىمدار شىعارىلدى. اتاپ ايتقاندا: «قازاق ءتىلى» (1–3-سىنىپتار)، «جاراتىلىستانۋ» (1–4-سىنىپتار)، «ورىس ءتىلى» (2–4-سىنىپتار)، «دۇنيەتانۋ» (2–3-سىنىپتار)، سونداي-اق «حيميا» جانە «بيولوگيا» (7–10-سىنىپتار، قازاق جانە ورىس تىلدەرىندە).
سونىمەن قاتار ورتا جانە جوعارى بۋىنعا ارنالعان وقۋلىقتار دا قايتا باسىلىپ شىقتى. اتاپ ايتقاندا، 7-سىنىپ ءۇشىن – «قازاق ادەبيەتى»، «قازاق ءتىلى مەن ادەبيەتى» (ورىس تىلىندە وقىتاتىن مەكتەپتەرگە)، «ورىس ءتىلى»، «ورىس ادەبيەتى»، سونداي-اق «ورىس ءتىلى مەن ادەبيەتى» (قازاق تىلىندە وقىتاتىن مەكتەپتەرگە) وقۋلىقتارى جاڭارتىلدى. بۇدان بولەك، الگەبرا، گەومەتريا، اعىلشىن ءتىلى، فيزيكا، بيولوگيا، حيميا، قازاقستان تاريحى جانە كوركەم ەڭبەك پاندەرى بويىنشا دا جاڭا باسىلىمدار ازىرلەندى. سونىمەن بىرگە «قازاقستان گەوگرافياسى» (7–8-سىنىپتار)، «قازاقستان تاريحى» (8-سىنىپ)، «العاشقى اسكەري جانە تەحنولوگيالىق دايىندىق» (10–11-سىنىپتار)، «قۇقىق نەگىزدەرى» (11-سىنىپ) وقۋلىقتارى قايتا باسىلىپ شىقتى.