ق ر دسم سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا مەكتەپ پەن بالاباقشاعا Ashyq جۇيەسىن ەنگىزۋ مۇمكىندىگى تۋرالى پىكىر ءبىلدىردى، دەپ حابارلايدى almaty-akshamy.kz حابار 24-كە سىلتەمە جاساپ.
«ءقازىر بالالاردىڭ قىركۇيەكتەن باستاپ ءداستۇرلى فورماتتا وقۋى تالقىلانىپ جاتىر. مەكتەپتە وقيتىن وقۋشىلاردىڭ سانى وتە كوپ: 3 ملن-نان استام وقۋشى بار. ولار ۆيرۋستى مەكتەپتە جۇقتىرۋى دا نەمەسە مەكتەپكە الىپ كەلۋى دە مۇمكىن. سوندىقتان ۋنيۆەرسيتەت پەن مەكتەپتەردە Ashyq جۇيەسىن ەنگىزۋ تالقىلانىپ جاتىر. مۇعالىمدەر ءداستۇرلى فورماتتا وقۋى ءۇشىن مىندەتتى تۇردە ۆاكسينا الۋى كەرەك. بۇل – بالالاردىڭ قاۋىپسىزدىگى. مەكتەپتەر مەن بالاباقشالارعا Ashyq جۇيەسىن ەنگىزۋگە كەلەتىن بولساق، تەلەفون ۇستاۋعا بولمايتىن مەكتەپتەردە كىرەبەرىستەگى كۇزەتشىگە جسن ايتۋ ارقىلى كىرۋگە بولادى. بۇل باس سانيتاردىڭ قاۋلىسىندا دا ايتىلعان»، – دەدى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا.