اقپان ايىنىڭ ءبىرىنشى بەيسەنبىسىندە بارلىق ەلدەردە سايلاۋ ورگاندارىنىڭ كاسىبي مەرەكەسى رەتىندە قۇرىلعان دۇنيەجۇزىلىك سايلاۋ كۇنى اتاپ وتىلەدى. بيىل ول 1 اقپاندا تويلاندى.
دۇنيەجۇزىلىك سايلاۋ كۇنى قارساڭىندا الماتى قالاسىنىڭ اۋماقتىق سايلاۋ كوميسسياسى «مەكتەپتەگى ءوزىن-وزى باسقارۋدىڭ ۇزدىك سايلاۋ جۇيەسى» قالالىق بايقاۋىن وتكىزدى، دەپ حابارلايدى اlmaty-akshamy.kz بۇل كونكۋرستىڭ باستى ماقساتى الماتى قالاسى مەكتەپ وقۋشىلارىنىڭ قازاقستان رەسپۋبليكاسىنىڭ سايلاۋ زاڭناماسى مەن سايلاۋ جۇيەسىنىڭ ەرەكشەلىكتەرى تۋرالى قۇقىقتىق ساۋاتتىلىعى مەن حاباردارلىعىن ارتتىرۋ، بولاشاق سايلاۋشىلاردىڭ دەموكراتيالىق قۇندىلىقتاردى قالىپتاستىرۋ.
بايقاۋ 2 كەزەڭدە وتكىزىلدى: 1-26 قاڭتار ارالىعىندا اۋداندىق جانە 1 اقپان كۇنى ناۋرىزباي اۋدانىنىڭ Älem وقۋشىلاردىڭ يننوۆاسيالىق شىعارماشىلىق ورتالىعىندا ۇيىمداستىرىلدى. اۋداندىق كەزەڭ قورىتىندىسى بويىنشا بايقاۋ فينالىنا قالانىڭ 8 مەكتەبى ءوتتى. ولار «№166 ليسەي» كمم، «№144 مەكتەپ-گيمنازيا» كمم، «گيمنازيا №132» كمم«گيمنازيا №132»، «№51 مەكتەپ-گيمنازيا» كمم، «№87 جببم» كمم، «№19 جببم» كمم، «№200 مەكتەپ-گيمنازيا» كمم، «№115 جببم» كمم.
ءىس-شارانى اشقان قالالىق سايلاۋ كوميسسياسىنىڭ ءتوراعاسى ايگۇل قالىقوۆا مەكتەپتەگى ءوزىن-وزى باسقارۋ جاستاردىڭ كوشباسشىلىق داعدىلارى مەن بەلسەندى ازاماتتىق ۇستانىمىن قالىپتاستىرۋدا ۇلكەن ءرول اتقاراتىنىن اتاپ ءوتتى. ول سونداي-اق قاتىسۋشىلاردىڭ بارلىق ۇسىنىستارى مەن باستامالارى ەسكەرىلىپ، قالا مەكتەپتەرىنىڭ ودان ءارى پراكتيكالىق قولدانۋى ءۇشىن ۇسىنىلاتىنىن باسا ايتتى.
بايقاۋ اياسىندا وقۋشىلار وزدەرىنىڭ يننوۆاسيالىق سايلاۋ ادىستەرى مەن باسقارۋ جۇيەلەرىن ۇسىندى. قاتىسۋشىلار شىعارماشىلىق يدەيالارىن، ۇيىمداستىرۋشىلىق داعدىلارى مەن كوشباسشىلىق قاسيەتتەرىن كورسەتتى. بايقاۋ قاتىسۋشىلارعا دەموكراتيالىق باسقارۋ، شەشىم قابىلداۋ جانە توپتىق جۇمىس سالاسىنداعى داعدىلارىن دامىتۋعا مۇمكىندىك بەردى.
الماتى قالاسى اۋماقتىق سايلاۋ كوميسسياسىنىڭ مۇشەلەرىنەن، ءبىلىم بەرۋ سالاسىنداعى مامانداردان، ءماسليحات دەپۋتاتتارىنان، قوعامدىق كەڭەس وكىلدەرىنەن تۇراتىن قازىلار القاسى ءار مەكتەپتىڭ جوبالارىن وزىندىك ەرەكشەلىگى، تيىمدىلىگى مەن قولدانىلۋ قاعيداتتارى بويىنشا باعالادى. جەڭىمپازداردى تاڭداۋ وڭاي بولعان جوق، ويتكەنى بارلىق قاتىسۋشىلار دايىندىقتىڭ جوعارى دەڭگەيىن كورسەتتى.
بايقاۋ قورىتىندىسى بويىنشا ءبىرىنشى ورىندى «№19 جببم» كمم، ەكىنشى ورىندى «№51 مەكتەپ-گيمنازيا» كمم، ءۇشىنشى ورىندى «№200 مەكتەپ-گيمنازيا» كمم يەلەندى. سونداي-اق، فيناليستەرگە الماتى قالاسى اۋماقتىق سايلاۋ كوميسسياسىنىڭ العىس حاتتارى تابىستالدى.
