قوستانايدا "مەكتەپتە بومبا بار" دەگەن جالعان حابار تاراتقان وقۋشى انىقتالدى، دەپ حابارلايدى اqshamnews.kz ءتىلشىسى Polisia.kz-كە سىلتەمە جاساپ.
پوليسياعا بەلگىسىز ادام قالا مەكتەپتەرىنىڭ بىرىنە جارىلعىش زات قويىلعانى تۋرالى حابار بەرگەن. قوڭىراۋدان كەيىن بايلانىس بىردەن ۇزىلگەن. وقيعا ورنىنا دەرەۋ پوليسەيلەر، جارىلعىش زاتتاردى زالالسىزداندىرۋ قىزمەتى، ءورت سوندىرۋشىلەر جانە مەديسينا قىزمەتكەرلەرى جەتىپ، مەكتەپ وقۋشىلارى مەن قىزمەتكەرلەرى شۇعىل ەۆاكۋاسيالاندى.
عيمارات پەن اۋماقتى تولىق تەكسەرۋ بارىسىندا ەشقانداي ءقاۋىپتى زات تابىلعان جوق. تەكسەرۋ ناتيجەسىندە جالعان حاباردى باسقا مەكتەپتىڭ 7-سىنىپ وقۋشىسى جاساعانى انىقتالدى. ول سىنىپتاسىنىڭ تەلەفونىن پايدالانىپ، مۇنى “ءازىل ءۇشىن” جاساعانىن جانە سالدارىن تۇسىنبەگەنىن مويىندادى.
ءجاسوسپىرىم قىلمىستىق جاۋاپكەرشىلىك جاسىنا تولماعاندىقتان، تەرروريزم اكتىسى تۋرالى كورىنەۋ جالعان حابار بەرۋ فاكتىسى بويىنشا قوزعالعان قىلمىستىق ءىس توقتاتىلدى. الايدا بالانىڭ اتا-اناسى ونى دۇرىس تاربيەلەمەگەنى ءۇشىن اكىمشىلىك جاۋاپكەرشىلىككە تارتىلدى. سونىمەن قاتار، وقيعاعا بايلانىستى جەدەل قىزمەتتەردىڭ شىعىندارىن ءوندىرۋ ماسەلەسى قاراستىرىلماق.
پوليسيا تەرروريزم اكتىسى تۋرالى جالعان حابار بەرگەنى ءۇشىن بەس جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكە سالىپ، اتا-انالاردى بالالارمەن قاۋىپسىزدىك، جالعان قوڭىراۋلاردىڭ سالدارى جانە تەلەفون مەن الەۋمەتتىك جەلىلەردى دۇرىس پايدالانۋ تۋرالى اڭگىمەلەسۋگە شاقىردى.