مەكتەپ ءمۇعالىمى ماماندىعىنىڭ تارتىمدىلىعىن ارتتىرۋ ماسەلەسى ءالى دە وزەكتى

ەلدە ۇستازدار قۇزىرەتتىلىگى ارتادى.

بۇل جونىندە مەملەكەت باسشىسى ءوزىنىڭ قازاقستان حالقىنا ارناعان كەزەكتى جولداۋىندا ايتتى، دەپ حابارلايدى Almaty-akshamy.kz. Egemen.kz-كە سىلتەمە جاساپ. 

«ءادىل قازاقستاندى قۇرۋدا مەكتەپ مۇعالىمدەرى شەشۋشى ءرول اتقاراتىنىنا سەنىمدىمىن. سوڭعى جىلدارى بۇل ماماندىقتىڭ تارتىمدىلىعىن ارتتىرۋ ءۇشىن مەملەكەت كوپ جۇمىس جاسالدى. الايدا، بۇل باعىتتا ءالى دە وڭ وزگەرىستەر قاجەت»، - دەپ اتاپ ءوتتى پرەزيدەنت بيىلعى جولداۋ بارىسىندا.

مەملەكەت باسشىسىنىڭ ايتۋىنشا، الدا پەداگوگيكالىق جوعارى وقۋ ورىندارىن اككرەديتتەۋدىڭ جاڭا ستاندارتىن قابىلداۋ جانە پەداگوگ قۇزىرەتتىلىگىنىڭ شەڭبەرىن ازىرلەۋ مىندەتى تۇر.

«جاھاندىق عىلىمي-تەحنيكالىق پروگرەستى ەسكەرە وتىرىپ، جوعارى سىنىپتاردا جاراتىلىستانۋ-ماتەماتيكالىق سيكل جانە اعىلشىن ءتىلى پاندەرىن وقىتۋدى كۇشەيتۋ ماڭىزدى»، دەدى قاسىم-جومارت توقايەۆ.

پرەزيدەنت ءوز سوزىندە وتاندىق جوعارى وقۋ ورىندارىنىڭ ساپاسى ارتۋىنا قاراي ولاردا وقۋ قۇنى دا وسەتىنىن قوسا ايتتى.

«مەملەكەت ءبىلىم بەرۋ گرانتتارىن ءبولۋدى جوسپارلاپ وتىر، ولار ۇبت ناتيجەلەرى مەن وزگە دە كورسەتكىشتەرگە بايلانىستى مولشەرى بويىنشا 30-دان 100%-عا دەيىن سارالانادى. وقۋعا جىلدىق 2-3% جەڭىلدىكپەن كرەديتتەر دە بەرىلەتىن بولادى. كورسەتىلگەن شارالار جوعارى ءبىلىمدى نەعۇرلىم قولجەتىمدى ەتەدى، سونداي-اق قوعامدا ارىپتەستىك پەن ءوزارا جاۋاپكەرشىلىك يدەولوگياسىن نىعايتادى»، - دەدى مەملەكەت باسشىسى.