ماڭعىستاۋ وبلىسىندا پروكۋرورلار وبلىس ورتالىعىنىڭ جالپى ءبىلىم بەرەتىن مەكتەپتەرىنىڭ بىرىندە ەسەپشى 76 ملن تەڭگەدەن استام بيۋدجەت قاراجاتىن جىمقىرعانىن انىقتادى، دەپ حابارلايدى Almaty-akshamy.kz.
شتاتتىق كەستە مەن بانكتىك شوتتاردى سالىستىرۋ بارىسىندا 3 جىل بويى وزىنە ارتىق سومانى ەسەپتەگەن مەكتەپتىڭ باس بۋحگالتەرىنىڭ ءتيىستى جانە ىس-جۇزىندە تولەنگەن جالاقىسىنىڭ اراسىنداعى ايىرماشىلىق انىقتالدى.
اتالعان فاكتى بويىنشا پروكۋرورلار قىلمىستىق ءىس قوزعاپ، تەرگەۋ ەتد-نە تاپسىرىلدى.
تەرگەۋ بارىسىندا اتالعان مەكتەپتىڭ ەسەپشىسى كىناسىن تولىقتاي مويىندادى.
سوت ۇكىمىمەن كىنالى ادام قازاقستان رەسپۋبليكاسى قىلمىستىق كودەكسىنىڭ 189-بابىنىڭ 4-بولىگى (سەنىپ تاپسىرىلعان مۇلىكتى يەمدەنۋ جانە ىسىراپ ەتۋ) بويىنشا 5 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرا وتىرىپ، 7 جىلعا باس بوستاندىعىنان ايىرىلدى.
سوت ۇكىمى زاڭدى كۇشىنە ەنگەن جوق.