مەكتەپ ديرەكتورلارىنىڭ جالاقىسى ءوسۋى مۇمكىن

وقۋ-اعارتۋ ءمينيسترى: مەكتەپ پەن كوللەدجدەردە ديرەكتورلاردىڭ تاپشىلىعى بايقالىپ وتىر.

بۇل تۋرالى پەداگوگتەردىڭ رەسپۋبليكالىق تامىز كونفەرەنسياسىندا ايتىلدى، دەپ حابارلايدى Almaty-akshamy.kz.

«مەكتەپ پەن كوللەدجدەردە، بالاباقشالاردا بىلىكتى ديرەكتورلاردىڭ تاپشىلىعى بايقالىپ وتىر. قازىرگى كەزدە ءبىراز ورىن بوس تۇر. ارينە، ءمۇعالىمنىڭ ەڭبەگى مەن بىلىكتىلىگى وتە ماڭىزدى. ءبىراق بارلىق ماسەلەنى شەشكەنىمەن، بىلىكتى ءارى ءبىلىمدى ديرەكتور بولماسا، وندا باسقا جاسالىپ جاتقان جۇمىستار ءتيىستى ناتيجەسىن بەرمەيدى. ديرەكتورلاردىڭ جالاقىسى مۇعالىمدەرمەن سالىستىرعاندا از ەكەنى بەلگىلى»، - دەدى اسحات ايماعامبەتوۆ.

وسى ورايدا مينيستر ديرەكتورلارعا ۇلكەن جاۋاپكەرشىلىك جۇكتەلەتىنىن ەسكە سالدى.

«ولارعا ءتۇرلى ايىپپۇلدار سالىپ كەتەدى. اتا-انالارمەن جانە مۇعالىمدەرمەن جۇمىس ىستەۋ كەرەك. الايدا ديرەكتورلاردىڭ الاتىن جالاقىسى وتە تومەن. سوندىقتان وسى باعىتتا جاڭا وقۋ جىلىندا بۇل ماسەلەنى شەشۋ تۇرعىسىندا ءتيىستى جۇمىستاردى اتقارامىز. ءقازىر 400-دەن استام ديرەكتور جاڭا وقۋ ورىندارىنا بارىپ، جۇمىسىن جالعاستىرىپ جاتىر. وسى ارىپتەستەرىمىزگە ۇلكەن العىسىمدى ايتقىم كەلەدى»، - دەدى ۆەدومستۆو باسشىسى.