مەكتەپ ديرەكتورلارىنىڭ جالاقىسى وسەدى

مەكتەپ ديرەكتورلارىنا جالاقى تولەۋ جۇيەسىنە وزگەرىس ەنگىزىلەدى.

اتالعان اقپارات جونىندە «ءبىلىم جانە عىلىم – ەلدىڭ تۇراقتى دامۋىنىڭ كەپىلى» تاقىرىبىنداعى پەداگوگتەردىڭ رەسپۋبليكالىق تامىز كونفەرەنسياسىنىڭ پلەنارلىق سەسسياسىندا ق ر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى Almaty-akshamy.kz. قازاقپارات سايتىنا سىلتەمە جاساپ.

«قازىرگى كەزدە مەكتەپ باسشىلىعىنىڭ جالاقى ماسەلەسى وزەكتى بولىپ تۇر. جالاقىنىڭ قازىرگى دەڭگەيىنە قاراپ، باسەكەگە قابىلەتتى مەنەدجەرلەر باسشىلىق قىزمەتكە بارۋعا قىزىقپايدى. جالپى، ۇزدىك پەداگوگتار مەكتەپ ديرەكتورى نەمەسە وقۋ ءىسىنىڭ مەڭگەرۋشىسى لاۋازىمىنا بارماي جاتادى»، - دەدى اسحات ايماعامبەتوۆ. 

بۇل باعىتتا مينيستر  ءتيىستى وزگەرىستەر كەرەك ەكەنىن اتاپ ءوتتى.

«مەكتەپ ديرەكتورلارىنىڭ جالاقىسى ۇستازدىڭ ەڭبەكاقىسىنان تومەن بولاتىن جاعدايلار ءجيى كەزدەسەدى. بۇل تۇرعىدا تاۋەكەلدەر دەڭگەيى ءارتۇرلى ەكەنى بەلگىلى. ءبىلىم مينيسترلىگى مەكتەپ ديرەكتورلارىنا جالاقى تولەۋ جۇيەسىنە وزگەرىس ەنگىزۋدى جوسپارلاپ وتىر»، - دەدى ول.