مەكتەپ ديرەكتورلارىنىڭ جالاقىسى كوتەرىلەدى

بۇل تۋرالى وقۋ-اعارتۋ ءمينيسترى عاني بەيسەمبايەۆ سەناتتىڭ جالپى وتىرىسىنان كەيىن ءمالىم ەتتى، دەپ حابارلايدى Almaty-akshamy.kz

«ءسىزدىڭ الدىڭىزداعى ءمينيستردىڭ كەزىندە مۇعالىمدەردىڭ عانا ەمەس، ديرەكتورلار مەن ورىنباسارلارىنىڭ، وزگە دە مەكتەپ قىزمەتكەرلەرىنىڭ ايلىعى وسەتىنى ايتىلعان ەدى. سول ۋادە ورىندالماعانى تۋرالى شاعىمدار بار. ونىڭ سەبەبى نەگە بايلانىستى؟» - دەپ سۇرادى جۋرناليست.

ءمينيستردىڭ ايتۋىنشا، بيىل مۇعالىمدەردىڭ ايلىعىن ارتتىرۋ شاراسى تولىق اياقتالعان.

ەندىگى كەزەكتە مەكتەپ باسشىلىعىنداعى لاۋازىم يەلەرىنىڭ ايلىعى وسپەك.

«مەملەكەت باسشىسىنىڭ 2019 جىلى بەرگەن تاپسىرماسى بويىنشا، 2020 جىلدان باستاپ مۇعالىمدەردىڭ ايلىعى جىل سايىن 25 پايىز كوتەرىلىپ وتىردى. بيىل تاعى 25 پايىز ارتىپ، ەكى ەسە كوتەرۋ تولىعىمەن اياقتالدى. كەلەسى باعىتتا مەكتەپ باسشىلارىنىڭ ايلىعىن دا كوتەرۋگە ءمان بەرۋىمىز كەرەك. بۇل باعىتتا دا وقۋ-اعارتۋ مينيسترىلىگى ءبىرشاما جۇمىس اتقارىپ جاتىر. پىسىقتاپ جاتىرمىز، بۇل وڭاي شارۋا ەمەس. بۇكىل وڭ-تەرىس تۇستارىن ەسەپتەۋ كەرەك. مىندەتتى تۇردە مەكتەپ باسشىلارىنىڭ ايلىعىن كوتەرۋ كەرەك. ءبىز ونى قولدايمىز. ويتكەنى وسى باعىتتا جۇمىس ىستەپ جاتىرمىز»، - دەدى عاني بەيسەمبايەۆ.