الماتىدا جول قۇرىلىسىنىڭ وزەكتى ماسەلەلەرى تالقىلاندى

قالاعا ساپالى جولدار قاجەت.

الماتىدا قالا اكىمى ەربولات دوسايەۆتىڭ توراعالىعىمەن 2023 جىلعا ارنالعان جول جۇمىستارىنىڭ جوسپارلارىن تالقىلاۋ جانە جول-جوندەۋ جۇمىستارىنىڭ ماۋسىمىنا دايىندىق بويىنشا كەڭەس ءوتتى، دەپ حابارلايدى Almaty-akshamy.kz

كەڭەسكە اكىمدىكتىڭ بەيىندى باسقارمالارى مەن ۆەدومستۆولىق باعىنىستى ۇيىمدارىنىڭ باسشىلارى، اۋدان اكىمدەرى، جول قۇرىلىسى سالاسىندا تەحنيكالىق قاداعالاۋدى جۇزەگە اسىراتىن مەردىگەرلىك ۇيىمدار مەن كومپانيالاردىڭ وكىلدەرى قاتىستى.

ەربولات دوسايەۆ قىس مەزگىلىنەن كەيىن قالا تۇرعىندارى جولداردىڭ قازىرگى جاعدايىنا لايىقتى نارازىلىق تۋدىراتىنىن اتاپ ءوتتى.

«شۇڭقىرلاردىڭ پايدا بولۋىنا، ليۋكتەردىڭ تۇسۋىنە جانە قىستا كوممۋنالدىق كاسىپورىنداردىڭ اپاتتى جانە جوسپارلى قازۋلار جۇرگىزۋىنە بايلانىستى جولداردى اعىمداعى جوندەۋدى جۇرگىزۋ ماسەلەسى وتكىر تۇر. تۇرعىندار تاراپىنان جۇمىستىڭ كەشىگۋىنە بايلانىستى كوشەلەردىڭ ۇزاق جابىلۋىنا قاتىستى تۇراقتى جانە ءادىل شاعىمدار بار. جۇمىستارعا  سەلقوس قاراۋ، فورماليزم جانە ساپا دەڭگەيىنىڭ تومەندىگى، بەكىتىلگەن ستاندارتتار، تاجىريبە كورسەتكەندەي، وڭ ناتيجە بەرمەۋدە. قالاعا ساپالى جولدار قاجەت. جۇمىستى دۇرىس جۇرگىزە المايتىن كومپانيالار ەندى قالادا جول جوندەۋ جۇمىستارىمەن اينالىسپايدى»، - دەدى قالا اكىمى.

الماتى اكىمى مەردىگەرلىك ۇيىمدار وتكەن جىلى جىبەرگەن بارلىق كەمشىلىكتەردى قىسقا مەرزىمدە جويۋدى تاپسىردى. قالا اكىمىنىڭ تاپسىرماسى بويىنشا تۇرعىنداردى الدىن الا حاباردار ەتۋ جانە پروسەستەردىڭ اشىقتىعىن، مەردىگەرلىك ۇيىمداردىڭ ەسەپتىلىگى مەن ءتارتىبىن ارتتىرۋ ءۇشىن ۆەدومستۆولىق ساراپتامادان وتكەننەن كەيىن ۋچاسكەلەر مەن ورىنداۋ مەرزىمدەرى كورسەتىلگەن جۇمىس كەستەسى جاريالاناتىن بولادى.

اعىمداعى جىلى قالانىڭ بەس شاعىن اۋدانىندا (قايرات، العاباس، اقجار، شۇعىلا جانە شاڭىراق-1) جول سالۋ جوسپارلانۋدا.

قالادا ورتاشا جوندەۋمەن ۇزىندىعى 200 كم-دەن اساتىن 220 كوشە، اعىمداعى جوندەۋمەن 350 مىڭ شارشى مەتردەن استام كوشە قامتىلادى. بۇل ماقساتتارعا تيىسىنشە 20 ملرد تەڭگە جانە 2،8 ملرد تەڭگە ءبولىندى.

سونداي-اق، ۇزىندىعى 30 كم تروتۋارلار مەن 40 ايالداما كەشەنىن جوندەۋ جوسپارلانۋدا.

ەربولات دوسايەۆ بيىلدان باستاپ وكىلەتتىكتەردى ورتالىقسىزداندىرۋ جانە جەكەلەگەن بيۋدجەتتەردى اۋدان اكىمدىكتەرىنە ءبولۋ اياسىندا جول توسەمىنىڭ اعىمداعى جوندەلۋى مەن جاي-كۇيى ءۇشىن اۋدان اكىمدىكتەرى جاۋاپتى بولاتىنىن اتاپ ءوتتى. قالا باسشىسى ولاردى جولدارداعى كەمشىلىكتەردى جويۋ بويىنشا جەدەل شارالار قابىلداۋعا مىندەتتەدى.

قالا باسشىسى جول توسەمىنىڭ ساپاسىن قامتاماسىز ەتۋ جانە مەرزىمدەردى ساقتاۋ ءۇشىن ينجەنەرلىك جەلىلەردى توسەۋ جانە جولداردى كەيىننەن جوندەۋ جۇمىستارىن سينحرونداۋ قاجەتتىگىن اتاپ ءوتتى. ەنەرگەتيكا جانە سۋمەن جابدىقتاۋ باسقارماسىنا تۇرعىندار مەن جەكە كومپانيالار تاراپىنان كەيىنگى جەكە قازۋلاردى بولدىرماۋ ماقساتىندا ينجەنەرلىك جەلىلەردى ابونەنتتەرگە تىكەلەي جەتكىزۋدى قامتاماسىز ەتۋ تاپسىرىلدى. اۋدان اكىمدىكتەرىنە تۇرعىندار اراسىندا اقپاراتتىق جۇمىستى كۇشەيتۋ تاپسىرىلدى-جولداردى جوندەۋ جانە سالۋ ينجەنەرلىك جەلىلەردى سالۋ جۇمىستارى اياقتالعاننان كەيىن عانا مۇمكىن جانە ورىندى بولادى.

كەڭەس بارىسىندا ەربولات دوسايەۆ بۇگىندە جولداردىڭ ەڭ وزەكتى ماسەلەلى ليۋكتەر ەكەنىن اتاپ ءوتتى. ولاردىڭ ساپاسىزدىعىنا جانە توسەۋ تەحنولوگياسىنىڭ بۇزىلۋىنا بايلانىستى اسفالت بارلىق جەردە شوگەدى، شۇڭقىرلار، كەتىكتەر مەن جارىقتار پايدا بولادى. مۇنداي جاعدايلاردىڭ الدىن الۋ ءۇشىن وتكەن جىلى الماتى اكىمىنىڭ تاپسىرماسى بويىنشا تەستىلىك رەجيمدە قالادا شەتەلدە قولدانىلاتىن «قالقىمالى» كورپۋستارى بار جاڭا تەحنولوگيا بويىنشا 25 ليۋك ورناتىلدى. حالىقارالىق تاجىريبە نەگىزىندە اسفالتتىڭ ويىق ءتۇزىلۋىن تومەندەتۋ ءۇشىن گوگول كوشەسىنىڭ ءۇش ۋچاسكەسىندە پوليمەرلەردى قولدانا وتىرىپ، اسفالتبەتون قوسپاسىن پيلوتتىق پايدالانۋ بويىنشا سىناقتار جالعاسۋدا. جاڭا شەشىمدەر ءوزىنىڭ تيىمدىلىگىن كورسەتتى جانە كۇزگى-قىسقى كەزەڭدە جۇكتەمەلەرگە توتەپ بەردى. ەربولات دوسايەۆ ولاردى ورتاشا جوندەۋ جانە جاڭا جولدار سالۋ كەزىندە كەڭىنەن قولدانۋدى تاپسىردى.

كەڭەس بارىسىندا جولدارداعى قاۋىپسىزدىك ماسەلەلەرىنە ەرەكشە نازار اۋدارىلدى. اعىمداعى جىلى 220 مەكتەپتىڭ جانىندا 270 رەتتەلمەيتىن جاياۋ جۇرگىنشىلەر وتكەلى جارىقتاندىرىلادى. ورتاشا جوندەۋ شەڭبەرىندە Vision Zero تۇجىرىمداماسى اياسىندا جول قوزعالىسىنا قاتىسۋشىلاردىڭ قاۋىپسىزدىگىن قامتاماسىز ەتۋ جونىندەگى جۇمىستار جالعاساتىن بولادى. قالا اكىمدىگى قاۋىپسىزدىك بولىكتەرىن ورناتۋ جانە ۆەلوسيپەد جولاقتارىندا 4 مىڭ سيگنالدىق بوللارد ورناتۋ جۇمىستارىن جوسپارلاۋدا. 179 وبەكتىدە رەتتەلمەيتىن جاياۋ جۇرگىنشىلەر وتكەلدەرى ورنالاسقان جەرلەردە دىبىس جولاقتارىن سالۋ جوسپارلانۋدا.

مەردىگەرلىك ۇيىمداردىڭ ۇزدىكسىز جۇمىسىن قامتاماسىز ەتۋ، سونداي-اق جاۋاپكەرشىلىك ايماعىن ارتتىرۋ ءۇشىن الماتى اكىمى 3 جىل مەرزىمگە جول ءجۇرىسى قاۋىپسىزدىگىن قامتاماسىز ەتۋ (جول ءجۇرىسىن رەتتەۋدىڭ تەحنيكالىق قۇرالدارىنا قىزمەت كورسەتۋ جانە ۇستاۋ) جونىندەگى جۇمىستارعا شارت جاساسۋدى قامتاماسىز ەتۋدى تاپسىردى.

جالپى، «الماتى قالاسىن 2025 جىلعا دەيىن دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالارىن» ىسكە اسىرۋ اياسىندا اعىمداعى جىلى اۆتوموبيل جولدارىنىڭ ۇلەسىن جاقسى جانە قاناعاتتانارلىق جاعدايدا 89%-عا (2022 جىلى – 86%)، 2025 جىلعا قاراي 95%-عا دەيىن جەتكىزۋ جوسپارلانۋدا.

كەڭەس قورىتىندىسى بويىنشا ەربولات دوسايەۆ جۇمىستاردىڭ ساپاسىن باقىلاۋدى كۇشەيتۋدى، مەردىگەر ۇيىمداردىڭ قۇرىلىس-جوندەۋ نورمالارىن ساقتاۋىن قامتاماسىز ەتۋدى جانە شارتتىق مىندەتتەمەلەر ورىنداماعان جاعدايدا – جوسىقسىز مەردىگەرلەر تىزىمىنە ەنگىزۋدى، ماتەريالداردى قۇقىق قورعاۋ ورگاندارىنا بەرۋگە دەيىن قاتاڭ شارالار قابىلداۋدى تاپسىردى. مەردىگەرلىك ۇيىمدار جۇمىس ساپاسىن ارتتىرۋ بويىنشا شارالار قابىلداۋعا جانە اتقارىلعان جۇمىس ءۇشىن جاۋاپكەرشىلىككە تارتىلۋعا مىندەتتەندى.