الماتى قالاسىنىڭ ورتالىق مادەنيەت جانە دەمالىس ساياباعىندا اتا-انا قامقورلىعىنسىز قالعان بالالارعا ارنالعان «شاتتىق شەرۋى» اتتى ۇلكەن مەرەكە ءوتتى.
اتالعان شارانى ءال-فارابي اتىنداعى قازاق ۇلتتىق ۋنيۆەرسيتەتىنىڭ ەكونوميكا جانە بيزنەس جوعارى مەكتەبىنىڭ قارجى جانە ەسەپ كافەدراسىنىڭ وقىتۋشىلارى مەن ستۋدەنتتەرى، سونداي-اق الماتى ۆەلوترەك ۇيىمى بىرلەسىپ ۇيىمداستىردى.
مەرەكەگە الماتى قالاسىنداعى №1 بالالار ءۇيى مەن الماتى وبلىستىق قيىن ءومىر جاعدايىنداعى بالالاردى قولداۋ ورتالىعىنىڭ تاربيەلەنۋشىلەرى شاقىرىلدى. بارلىعى 50-دەن استام بالا قاتىستى. بالالارعا ارناپ كونسەرتتىك باعدارلاما، ۆەلوجارىس، فلەشموبتار، ويىندار مەن پيكنيك ۇيىمداستىرىلدى. كۇن شۋاعىندا وتكەن فەستيۆال شىن مانىندە بالالار ءۇشىن ەرەكشە سىيلىق بولدى.
رايگۇل دوسجان، ءال-فارابي اتىنداعى قازۇۋ ەكونوميكالىق زەرتتەۋلەر ورتالىعىنىڭ ديرەكتورى:
– بۇل شارانى ءبىز وسىمەن ەكىنشى رەت وتكىزىپ وتىرمىز. ۋنيۆەرسيتەت وقىتۋشىلارى مەن ستۋدەنتتەرى اتسالىسىپ، بالالارعا كوتەرىڭكى كوڭىل-كۇي سىيلاۋدى ماقسات ەتتىك. سونىمەن قاتار، مۇنداي شارالار جاستارعا الەۋمەتتىك جاۋاپكەرشىلىك پەن قوعامعا پايدالى بولۋ سەزىمىن ۇيالاتادى. ۆەلوترەك ۇيىمىنىڭ قولداۋىمەن ۆەلوجارىس ۇيىمداستىرىلىپ، جۇلدەگەر بالالارعا سىيلىقتار بەرىلدى. كونسەرتكە وقىتۋشىلار، ستۋدەنتتەر، ونەرلى وتباسىلار، بلوگەرلەر مەن جاس انشىلەر قاتىستى. اتموسفەرا وتە كەرەمەت، بۇگىن ءوزى – ءان، بي، كۇلكى مەن شاتتىققا تولى كۇن بولدى.
مەرەكەلىك كەشتە بالالاردىڭ وزدەرى دە ونەرلەرىن ورتاعا سالدى. ماسەلەن، بالالار ءۇيىنىڭ 8-سىنىپ وقۋشىسى گۇلجاينا ەسەنبايەۆا «ساربازدار» ءانىن ورىنداپ، كورەرمەندەردىڭ ىستىق ىقىلاسىنا بولەندى. سونىمەن قاتار، كىشكەنتاي انشىلەر ينابات كەنگاكوۆا مەن ايارۋ بەيسەنبەكوۆا دا ساحنادا ونەر كورسەتتى.
ءلاززات جەكسەمبايەۆا، ارناۋلى الەۋمەتتىك قىزمەت كورسەتۋ ورتالىعىنىڭ تاربيەشىسى:
– بۇل بالالار – اتا-انانىڭ مەيىرىمىنەن تىس قالعان جاندار. مۇنداي شارالار ولاردىڭ جان دۇنيەسىنە جىلۋ سىيلايدى. بالالار ەرەكشە قۋانىپ ءجۇر. ءان ايتىپ، ويناپ، جاڭا دوستار تاۋىپ جاتىر. ۇيىمداستىرۋشىلارعا العىسىمىز شەكسىز.
ساۋلە بايبالاقوۆا، ورتالىق تاربيەشىسى:
– وسى سالادا 1994 جىلدان بەرى جۇمىس ىستەيمىن. بۇگىنگى مەرەكەگە 50-گە جۋىق بالانى الىپ كەلدىك. بالالارىمىز ونەرلى، جان-جاقتى، تالانتتى. مىسالى، گۇلجاينا – ساباعى ۇزدىك، العىر قىز. بۇل مەرەكە بالالاردىڭ كوڭىلىن سەرپىلتىپ، سىيلىقتارمەن قۋانتتى. وسىنداي شارالار كوبىرەك بولسا ەكەن.
تانىمال بلوگەرلەر اسحات ەرالييەۆ پەن جان ءىزباسار مەرەكەنى كوڭىلدى جۇرگىزىپ، بالالارعا ازىل-قالجىڭىمەن شاتتىق سىيلادى.
«شاتتىق شەرۋى» مەرەكەسى – مەيىرىمدىلىك پەن قامقورلىقتىڭ، ناعىز ادامگەرشىلىكتىڭ كورىنىسى بولدى. كەش سوڭىندا ۇيىمداستىرۋشىلار بالالارعا ارناپ ىستىق تاماق پەن ءتۇرلى بايقاۋلار ۇيىمداستىرىپ، جەڭىمپازدارعا باعالى سىيلىقتار تابىستادى.
