بيىل 10 جىلدىق مەرەيتويىن اتاپ وتكەن ارماتۋرا فەستيۆالى الماتىداعى «مەرەي» ساۋدا ورتالىعىنىڭ الاڭىندا ەتنواۋىل ۇلگىسىندە ءوتتى. 
بۇل جولى شارا سپورتتى سەرىك ەتكەندەرمەن قاتار، ءار جاستاعى قالا تۇرعىندارىن توعىستىرعان كەڭ اۋقىمدى قوعامدىق مەرەكەگە اينالدى. ۇلتتىق ويىندار، قولونەر شەبەرلەرىنىڭ كورمەسى، تانىمدىق كەزدەسۋلەر مەن سپورتتىق سايىستار ءىس-شاراعا ايرىقشا اتموسفەرا مەن مەرەكەلىك رۋح سىيلادى. ارماتۋرا فەستيۆالىنىڭ نەگىزىن قالاۋشى، ارمرەستلينگ شەبەرى ەۆگەنيي شامرايدىڭ ايتۋىنشا، بۇل باستاما 2008 جىلى باستالعان. العاشقى چەمپيونات 2014 جىلى ۇيىمداستىرىلىپ، سودان بەرى جىل سايىن جاستاردى سپورتقا باۋلۋدى ماقسات ەتكەن ءداستۇرلى شاراعا اينالدى.
– فەستيۆالىمىزدىڭ جىل سايىن كوپشىلىكتى جينايتىنى قۋانتادى. بۇل جولى باعدارلامامىزدىەتنيكالىق ەلەمەنتتەرمەن تولىقتىرۋ – ءساتتى شەشىم بولدى دەپ ويلايمىن. الداعى ۋاقىتتا قازاقتىڭ ۇلتتىق ويىندارىن دا سپورتتىق مەرەكەنىڭ اجىراماس بولىگىنە اينالدىرۋدى كوزدەپ وتىرمىز. ويتكەنى ءبىزدىڭ مادەني مۇرامىز باي، تاڭدايتىن دۇنيەلەر جەتكىلىكتى. بۇل تەك جارىس ەمەس، جاستار ءۇشىن شابىت، ءوز كۇشىن سىناۋعا مۇمكىندىك. ءبىز ينكليۋزيۆتى ورتا قالىپتاستىرىپ جاتىرمىز، – دەيدى ەۆگەنيي شامراي.
فەستيۆال باعدارلاماسى بۇرىن-سوڭدى بولماعان مازمۇنمەن ەرەكشەلەندى: 13 سپورتتىق لوكاسيادا تۋرنيككە تارتىلۋ، كىر تاسىن كوتەرۋ، قول كۇرەسى، جاتتىعۋلار جاساۋ سەكىلدى ءتۇرلى جارىستار ۇيىمداستىرىلدى. ءار تاپسىرمانى ورىنداعان قاتىسۋشى ارنايى سيمۆوليكالىق تيىندار جيناپ، ولاردى سۋ، باۋىرساق، ت.ب. تاعامدارعا الماستىرىپ ماز-مەيرام بولدى. 
ەرەكشە نازار اۋدارتقان «پەتروگليفتەر كيىز ءۇيى»كوپشىلىكتى قازاق تاريحىمەن تانىستىرىپ، جاس عالىمدار مەن قولونەرشىلەردى توعىستىردى. مۇندا ۇلتتىق ستيلدەگى بۇيىمدار، شەبەرلەر كورمەسى، التىباقان، بالالارعا ارنالعان ويىن الاڭدارى، ەتنوفوتوايماق پەن كونسەرتتىك باعدارلاما ۇسىنىلدى. فەستيۆالگە كەلگەن ءار ادام وزىنە لايىق ءىس تاۋىپ، قىزىقتى ۋاقىت وتكىزدى.
فەستيۆالدىڭ تۇراقتى قاتىسۋشىسى، الماتى قالالىق قوعامدىق كەڭەستىڭ مۇشەسى بوگدان دجەپكا بۇل شارانى تەڭ مۇمكىندىكتەر قوعامىن قۇرۋدىڭ جارقىن ۇلگىسى دەپ باعالادى:
– مۇندا ەشكىم شەت قالمايدى. سپورت ارقىلى ادامدار بىرىگەدى، جاڭا دوستار تابادى. مۇنداي فەستيۆالدەر قالانىڭ ءار اۋدانىندا ءوتۋى كەرەك، – دەيدى ول.
سپورتشىلاردى تىركەپ، ءاربىر سپورتتىق كەزەڭدى ءادىل باعالاۋعا تىرىسقان ۇيىمداستىرۋشىلار توبى جەڭىمپازدار مەن بەلسەندى قاتىسۋشىلارعا تاتتىلەر مەن سىيلىقتار ۇلەستىردى.
– بۇل – جاستاردى سالاۋاتتى ءومىر سالتىنا باۋلۋدىڭ تاماشا ءتاسىلى. ءبىزدىڭ ماقسات – تەك سپورتتى ناسيحاتتاۋ عانا ەمەس، سونىمەن بىرگە كوتەرىڭكى كوڭىل-كۇي مەن ادامدار اراسىنداعى جىلى قارىم-قاتىناستى قالىپتاستىرۋ، – دەيدى قاتىسۋشىلاردىڭ ءبىرى، الماتىلىق بەرىك قۇرالباي.
كيىز ۇيلەر، ءان مەن بيدەن شاشۋ شاشقان ونەرپازدار، باۋىرساق پەن ىستىق شاي، بالالاردىڭ شات كۇلكىسى – بارلىعى قازاقتىڭ قوناقجاي مادەنيەتى مەن سپورتتىق رۋحتى تاماشا ۇشتاستىردى. ۇيىمداستىرۋشىلار مەرەكە سوڭىندا قاتىسۋشىلارعا العىس حاتتار مەن سىيلىقتار تابىستادى. مەرەكە كەش قارايعانشا جالعاستى.
P.S: ارماتۋرا فەستيۆالى – بۇل جاي عانا جارىس ەمەس، ول – ادامداردى جاقىنداستىراتىن، قوعامدى بىرىكتىرەتىن ۇلكەن مەرەكە. مەرەيتويلىق شارا ءبىر كۇنمەن شەكتەلمەي، جۇرەكتەردە ۇزاق ساقتالاتىن اسەر قالدىردى.