قورعانىس ءمينيسترى ايەل اسكەري قىزمەتشىلەردى مەرەكەمەن قۇتتىقتادى
قورعانىس مينيسترلىگىندە ۆەدومستۆو باسشىسى اسكەري قىزمەتشى ايەلدەرمەن كەزدەستى، دەپ حابارلايدى Almaty-akshamy.kz.
گەنەرال-پولكوۆنيك رۋسلان جاقسىلىقوۆ نازىك جاندىلاردىڭ بۇگىندە ءتۇرلى سالادا ەڭبەك ەتىپ جۇرگەن اتاپ ءوتتى. ولاردىڭ جەتىستىكتەرى مەن شىققان بيىگى بارلىق قازاقستاندىقتارعا جىگەر بەرىپ، ىنتالاندىرادى. ۇلى وتان سوعىسى جىلدارى دا وسىلاي بولدى.
– سوعىس – ەر ازاماتتاردىڭ ءىسى ەكەنى بارىمىزگە ءمالىم. الايدا 1941-1945 جىلدارى بولعان سۇراپىل كەزەڭ تالاي باتىرلاردى تانىتتى. سىن ساعاتتا ەلى ءۇشىن قازاق حالقىنىڭ داڭقتى قىزدارى ءاليا مولداعۇلوۆا، مانشۇك مامەتوۆا، حيۋاز دوسپانوۆا جانە باسقا دا كوپتەگەن ايەلدەر ەرلەرمەن تىزە قوسىپ، وتان قورعادى، – دەدى مينيستر.
اسكەري قىزمەتشى قىز-كەلىنشەكتەردىڭ ارمياداعى جاۋىنگەرلىك ازىرلىكتىڭ جانە اسكەري قىزمەتتىڭ بەدەلىن ارتتىرۋداعى ءرولىن اتاپ ءوتىپ، قورعانىس ۆەدومستۆوسىنىڭ باسشىسى ادال قىزمەتى ءۇشىن شىن جۇرەكتەن العىس ايتتى.
ولاردىڭ قاتارىندا دەسانتشىلار مەن سپورتشىلار، مەملەكەتتىك قۇپيالاردى قورعاۋ جانە جاۋىنگەرلىك دايارلىق جونىندەگى ماماندار، اسكەري پوليسەيلەر مەن دارىگەرلەر، تەحنيكالىق ماماندار مەن بايلانىسشىلار، اسكەري پسيحولوگتار مەن قارجىگەرلەر، كادر ماماندارى مەن تاربيەشىلەر بار.
– بۇگىندە ولار مەيىرىمدى انا، ادال جار جانە ءۇي شارۋاسىنداعى تاماشا جان عانا ەمەس، اسكەري قىزمەتشى ايەلدەر اۋە كەمەلەرىن دە باسقارادى، تەڭىز ناۆيگاسيالىق مىندەتتەرىن دە ورىنداۋعا قاتىسادى، ۇقشۇ مەن شىۇ اياسىنداعى جاتتىعۋلارعا دا قاتىسادى، ەر ادامدارمەن تەڭ دارەجەدە جاۋىنگەرلىك كەزەكشىلىك تە اتقارادى، – دەپ اتاپ ءوتتى گەنەرال-پولكوۆنيك رۋسلان جاقسىلىقوۆ.
23366 اسكەري ءبولىمى كومانديرىنىڭ تاربيە جانە يدەولوگيالىق جۇمىس جونىندەگى ورىنباسارى پودپولكوۆنيك جانار وسپانوۆا ءوزىنىڭ 1996 جىلدان بەرى قارۋلى كۇشتەردە جاۋاپتى لاۋازىمدى قىزمەتىن اتقارا ءجۇرىپ، بالالارىنا قامقور، وتباسىنداعى باق-بەرەكەنىڭ ۇيىتقىسى بولۋىنىڭ سىرىمەن ءبولىستى.
– قۇپيا ەشتەمە جوق. ەڭ باستىسى – ۇنەمى جيناقى بولۋ، وتباسىنداعى باستى نارسە بەرەكە ەكەنىن ۇمىتپاۋ. سونىمەن قاتار بەلسەندىلىكتى جوعالتپاۋ دەپ ويلايمىن، – دەدى جانار وسپانوۆا.
قورعانىس ۆەدومستۆوسىنىڭ باسشىسى وليمپيادا چەمپيونى، قورعانىس مينيسترلىگى سپورت كوميتەتىنىڭ شتاتتىق كوماندالاردى دايارلاۋ ورتالىعى باستىعىنىڭ ورىنباسارى پودپولكوۆنيك ولگا رىپاكوۆاعا زور العىسىن ءبىلدىردى. بيىلعى جىلى اتاقتى جەڭىل اتلەت سپورتتىق مانسابىن اياقتاعانىن مالىمدەدى، دەگەنمەن ونىڭ باي تاجىريبەسى مەن ءبىلىمى ارميا سپورتشىلارىن دايارلاۋ ىسىندە سۇرانىسقا يە ەكەنى انىق.
قارۋلى كۇشتەردىڭ ارداگەرى، زاپاستاعى پولكوۆنيك مارا رايىموۆا «استانا» وڭىرلىك قولباسشىلىعى قولباسشىسىنىڭ ورىنباسارىنا دەيىن كاسىبي تۇرعىدا تىنىمسىز ەڭبەگىمەن ءوستى. ونىڭ ءومىر جولى – ءاربىر اسكەري قىزمەتشىگە ۇلگى بولارلىق.
كەزدەسۋدىڭ ءار قاتىسۋشىسى تۋرالى كوپ نارسە ايتۋعا بولادى. گۆارديا سەرجانتى نادەجدا كولدىريەۆا 32363 اسكەري بولىمىندە قىزمەت ەتىپ، 17 رەت پاراشيۋتپەن سەكىردى. 35835 اسكەري ءبولىمى شتابىنىڭ وفيسەرى اعا سەرجانت تولقىن باكىجانوۆا ارميا حالىقارالىق ويىندارىنىڭ «بەيبىتشىلىك جاۋىنگەرى» بايقاۋىندا قارۋلى كۇشتەردىڭ نامىسىن قورعادى. وسى بايقاۋدا بىرنەشە جىل قاتارىنان قازاقستان كومانداسىنىڭ ءبىرىنشى ورىن الۋىندا ونىڭ دا ەرەن ەڭبەگى بار.
الماتى گارنيزونى باسپا ءسوز قىزمەتىنىڭ باستىعى، پودپولكوۆنيك كريستينا نوۆيكوۆانىڭ دومبىرادا كۇي تولعاۋى ايەلدەردىڭ جان-جاقتى تالانتتى ەكەنىنىڭ تاعى ءبىر دالەلى بولدى.
كەزدەسۋ سوڭىندا قورعانىس ءمينيسترى رۋسلان جاقسىلىقوۆ جوعارى كورسەتكىشتەرى مەن ۇلگىلى قىزمەتى ءۇشىن ەرەكشە كوزگە تۇسكەن ايەلدەرگە قۇرمەت گراموتالارى مەن مەدالدار تابىس ەتتى.
ءبىرقاتار اسكەري قىزمەتشىلەرگە مەرزىمىنەن بۇرىن اسكەري اتاقتار بەرىلدى.