ورتا سالماقتا جۇدىرىقتاساتىن قازاقستاندىق مەيىرىم نۇرسۇلتانوۆ (15-0، 8كو) پەن رەسەيلىك بوكسشى اندرەي سيروتكين (19-1-1، 7كو) اراسىنداعى جەكپە-جەكتىڭ داتاسى اۋىستى
بۇعان دەيىن ايقاس 22 قاڭتارعا جوسپارلانعان ەدى، دەپ حابارلايدى Almaty-akshamy.kz قازاقپاراتقا سىلتەمە جاساپ
بۇل تۋرالى «قازاقستاننىڭ كاسىپقوي بوكسى» پاراقشاسىندا جاريالاندى.
ەندى جەكپە-جەك 5 اقپان كۇنى اقتاۋدا وتەتىن بوكس كەشىنىڭ باستى وقيعاسى بولماق.
سيروتكين ءساۋىر ايىنداعى سوڭعى كەزدەسۋىندە ۇلىبريتانيادا جەرگىلىكتى بوكسشى دەنني ديگنۋممەن تەڭ تۇسكەن ەدى.
ال مەيىرىم نۇرسۇلتانوۆ بۇعان دەيىن شارشى الاڭعا ماۋسىمدا شىعىپ، تورەشىلەردىڭ ءبىراۋىزدى شەشىمىمەن بەلارۋس دميتريي اتروحوۆتان باسىم ءتۇستى. ⠀
ايتا كەتەيىك، قازاقستاندىق بوكسشى – ورتا سالماقتاعى WBC (USNBC) چەمپيونى. بەدەلدى BoxRec.com پورتالى نۇرسۇلتانوۆتىڭ بۇل جەكپە-جەگىنە ءۇش جۇلدىز (ەڭ كوبى – بەس جۇلدىز بولا الادى) دەگەن باعا بەرىپ وتىر.
بۇل - مەيىرىمنىڭ سپورتتىق مانسابىنداعى ەڭ جوعارى باعا. بۇعان دەيىنگى كەزدەسۋلەرىنىڭ ءبارى ەكى جۇلدىزدان اسپاعان ەدى.