كانديدات سارايشىق اۋىلىنىڭ دارىگەرلەرىمەن كەزدەستى
قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆتىڭ ۇگىت-ناسيحات جۇمىستارى اتىراۋ وبلىسىندا جالعاستى. كانديدات سارايشىق اۋىلىنىڭ دارىگەرلەرىمەن كەزدەستى. كەزدەسۋدە اۋىلدىق ەلدىمەكەندەردەگى مەديسينالىق قىزمەتتىڭ ساپاسى جايلى ايتىلدى، دەپ حابارلايدى Almaty-akshamy.kz.
بۇگىنگى اۋىلدارداعى ينفراقۇرىلىمدىڭ وزەكتى پروبلەمالاردىڭ ءبىرى – مەديسينالىق ساقتاندىرۋمەن قامتاماسىز ەتۋ. اۋىل تۇرعىندارىنىڭ تۇراقتى جۇمىسى بولماعاندىقتان مەديسينالىق ساقتاندىرۋ قورىنا تۇسەتىن تۇسىمدەرى جوق. سول سەبەپتى مەملەكەت تاراپىنان كورسەتىلەتىن مەديسينالىق كومەك اۋىلدىقتارعا ارمان.
«ءقازىر مەديسينالىق ساقتاندىرۋىڭ بولماسا ەشكىمگە كەرەكسىزسىڭ. وسى ولقىلىقتىڭ ورنىن تولتىرۋ ءۇشىن اۋىلدىقتاردى تۇراقتى جۇمىسپەن قامتاماسىز ەتۋ كەرەك. بۇگىنگى جاعدايدا بۇل مۇمكىن ەمەس. ءبىراق تىعىرىقتان شىعۋدىڭ باسقا جولى بار. ول –جەكە ءۇي شارۋاشىلىعى كووپەراسياسىن قۇرۋ. ءبىر جۇش-تە ەڭ كەمى ەكى ادام – ەرى مەن ايەلى جۇمىس ىستەيدى، ياعني ءوزىن-وزى قامتاماسىز ەتەدى. ولار وندىرگەن اۋىلشارۋاشىلىعى ءونىمىن كووپەراتيۆكە وتكىزسە كووپەراتيۆ ولاردان سالىقتى ۇستاپ قالۋعا مىندەتتى. سالىقتىڭ ءبىر بولىگى ءتورتىنشى دەڭگەيدەگى بيۋدجەتتى، ياعني سول اۋىلدىڭ اكىمىنىڭ بيۋدجەتىن قالىپتاستىرۋعا، ءبىر بولىگىن اۋىلدىقتاردىڭ زەينەتاقى قورىنداعى، الەۋمەتتىك ساقتاندىرۋ جانە مەديسينالىق ساقتاندىرۋ قورىنداعى جيناقتاۋ شوتىنا اۋدارۋعا بولادى. بۇل ءۇي شارۋاشىلىعىندا جۇمىس ىستەيتىن ازاماتتاردى مەديسينالىق قىزمەتپەن قامتاماسىز ەتۋگە كومەك بولادى. ەگەر شەنەۋنىكتەر اۋىلدا تۇراقتى جۇمىس ورنىن قۇرۋمەن نەمەسە اۋىل كووپەراسياسىن ىنتالاندىرۋمەن اينالىسقىسى كەلمەس، وندا اۋىل تۇرعىندارىن مەديسينالىق ساقتاندىرۋ تالابىن تىپتەن الىپ تاستاعا تۋرا كەلەدى. اۋىلدىقتارعا بارلىق مەديسينالىق قىزمەت مەملەكەت ەسەبىنەن تەگىن كورسەتىلۋى ءتيىس»، – دەدى كانديدات.
بۇدان كەيىن كانديدات اۋىل مۇعالىمدەرىمەن كەزدەستى. وندا ول دالا دەموكراتياسىنىڭ ۇستانىمدارى جايلى ايتىپ، ولارمەن بىرگە ار-وجداندى، تاربيەلى ۇرپاق ءوسىرۋ ماسەلەسىن تالقىلادى. ءبىلىم بەرۋ ادىستەمەسىن وزگەرتۋدىڭ قانشالىقتى وزەكتى ەكەنىن تىلگە تيەك ەتتى.
«تاربيە تالبەسىكتەن باستالادى. ال تالبەسىكتىڭ توركىنى اۋىلدا. كىشىگە – ىزەت، ۇلكەنگە – قۇرمەت ءتارىزدى ادامي قاسيەتتىڭ ءبارى اعا بۋىننىڭ اڭگىمەسىنەن الىنادى. مادەنيەت وسىدان باستالادى. جوعارى دەڭگەيدەگى مادەنيەتتى قالىپتاستىراتىن وسى اۋىل مەكتەپتەرى. سوندىقتان مۇعالىمدەردىڭ ساباق بەرۋ ءادىسىنىڭ، تاربيە جۇمىسىنىڭ ماڭىزى زور»، – دەدى ج. دايرابايەۆ.