قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆتىڭ ۇگىت-ناسيحات جۇمىستارى اتىراۋ وبلىسىندا جالعاستى، دەپ حابارلايدى Almaty-akshamy.kz.
ساپار بارىسىندا كانديدات اتىراۋ قالاسى ماڭىنداعى ماحامبەت اۋدانىنا قاراستى جول بويىندا سالىنىپ جاتقان جىلىجايلاردىڭ قۇرىلىس جۇمىسىمەن تانىستى. اتالعان كەشەن 5،6 گەكتار اۋماقتا زاماناۋي تەحنولوگياعا سايكەس سالىنىپ جاتىر. جىلىجاي جوسپار بويىنشا پايدالانۋعا 2023 جىلدىڭ كوكتەمىندە بەرىلىپ، اتىراۋ قالاسى تۇرعىندارىن قىزاناقپەن قامتاماسىز ەتەتىن بولادى. كەشەندە جاڭبىرلاتىپ سۋارۋ جۇيەسى قاراستىرىلعان. كانديداتتىڭ پىكىرىنشە جاۋىن-شاشىن سيرەك تۇسەتىن، كۇن شۋاعى مول مۇنداي وڭىرگە جىلىجايلار وتە قاجەت. ۇكىمەت مۇنداي شارۋاشىلىقتارعا جول سالۋ، سۋ، ەلەكتر جەلىلەرىن تارتىپ بەرۋ سياقتى بارىنشا قولداۋ كورسەتۋى ءتيىس. جالپى قۇنى 8 ملرد تۇراتىن جوبا قارجىسىنىڭ ءبىر بولىگى بانكىدەن الىنعانىن ەستىگەن كانديدات ەداۋىر قىنجىلىس ءبىلدىردى.
«بايتەرەك» حولدينگى، اگرارلىق نەسيە كورپوراسيا سياقتى كۆازيمەملەكەتتىك قارجى ينستيتۋتتارى تۇرعاندا شارۋالار نەلىكتەن بانككە جۇگىنەدى؟ بۇل ەلىمىزدە اگرارلىق ساياساتتىڭ دۇرىس جولعا قويىلماعانىن كورسەتسە كەرەك. قوجالىقتار قولعا العان جوبالارىنىڭ بويىنا قان جۇگىرتەتىن قاراجات تابۋدىڭ شەشىمى وسىنداي بولعاندىقتان بۇعان دا كونۋگە ءماجبۇر»، – دەدى ج. دايرابايەۆ.
كانديدات جىلىجايدان كەيىن حالىقتى بىرنەشە جىلدان بەرى ەشكى سۇتىمەن قامتاماسىز ەتىپ وتىرعان شارۋاشىلىق – ماحامبەت اۋدانىنىڭ سارايشىق اۋىلىنداعى زاماناۋي ەشكى فەرماسىنا باردى. فەرمانى قۇرۋشى –
قازاقستاننىڭ ەڭبەك ەرى – روزىمەتوۆ ۆلاديمير فەدوروۆيچ. ول شارۋاشىلىقتى 10-15 جىل بۇرىن ساتىپ الىپ، قايتا قۇرىلىمداپ، بۇگىندە ۇلكەن كەشەنگە اينالدىرىپ وتىر.
«بۇل ەڭبەك ادامىنىڭ ناتيجەلى جۇمىسىنىڭ ارقاسى. وعان مەملەكەتتىك جوعارى ماراپاتتىڭ بەرىلۋى ەڭبەك ادامىنىڭ باعالانۋى. وسىنداي ادامداردىڭ توككەن تەرى مەملەكەت تاراپىنان ەسكەرىلىپ، قۇرمەتتەلىپ وتىرسا حالىقتىڭ اۋىل شارۋاشىلىعىنا، اگروبيزنەسكە دەگەن ىنتاسى ارتادى»، – دەدى كانديدات.
ەشكى فەرماسى زاماناۋي تەحنولوگيا ارقاسىندا جوعارى ونىمدىلىككە قول جەتكىزگەن. دەسەك تە، مۇندا مال ازىعىنىڭ بازاسى جۇتاڭ. جايىق وزەنىندە بۇرىنعىداي مول سۋ جوق. ول جىل وتكەن سايىن تارتىلۋدا. سۋ جەتكىلىكسىز.
«ماسەلەنى تۇبەگەيلى شەشپەي ءىس العا باسپايدى. ءبىر اتتەڭى، ءقازىر قازاقستاندا سۋ ماماندارى تىپتەن قالماعان. جاۋاپتى ۆەدومستۆالاردى ىستەيتىن مامانداردىڭ سۋ سالاسىندا تاجىريبەسى جوق. بۇل ءوندىرىستىڭ قىر-سىرىن بىلمەيدى. سوندىقتان ترانسشەكارالىق سۋلار بويىنشا كەلىسسوزدەر جۇرگىزگەندە كوبىنە ۇتىلىپ جاتادى. وسى ولقىلىقتىڭ ورنىن تولتىرۋ قاجەت. اتىراۋ وڭىرىندە جايىقتان بولەك جەراستى سۋ مول. ونى گەولوگيالىق زەرتتەۋلەر راستاپ وتىر. وسى جەراستى سۋلارىن دۇرىس پايدالانۋدى قولعا الۋ كەرەك»، – دەدى ج. دايرابايەۆ.
وبلىس تۇرعىندارى كانديداتتىڭ باستامالارى مەن سايلاۋالدى باعدارلاماسىن تىڭدادى.