جىل باسىنان بەرى الماتىدا 95 مىڭ مەديسينالىق قىزمەت ءتۇرلى كەمشىلىكتەرمەن كورسەتىلگەن.
ماسەلەن، دارىگەرلەر ەمدەۋ-دياگنوستيكا بارىسىندا بەلگىلەنگەن ستاندارتتاردان اۋىتقىعان. سونداي-اق مەديسينالىق قۇجاتتاردى دۇرىس تولتىرماي، قىزمەت باعاسىن نەگىزسىز ءوسىرۋ سىندى ولقىلىقتاردى جىبەرگەن، دەپ حابارلايدى Almaty-akshamy.kz.
ءتىپتى، 10 ميلليون تەڭگەگە «كورسەتىلدى» دەپ جازىلعان كومەكتىڭ شىن مانىندە كورسەتىلگەنىن راستاي الماعان كلينيكالار دا بار بولىپ شىقتى.
مەديسينالىق ساقتاندىرۋ قورى تالاپقا ساي جۇمىس ىستەمەگەن مەكەمەلەرگە 629 ميلليون تەڭگە ايىپپۇل سالدى. قور ماماندارى ستاسيونارلار مەديسينالىق قىزمەت كورسەتۋدەن باس تارتقان جاعدايدا بىردەن حابارلاۋدى سۇرادى.
ەگەر پاسيەنتكە قاجەتتى كومەك كورسەتۋدەن باس تارتىلسا، وندا ولار ءار مەديسينالىق ۇيىمدا قۇرىلعان پاسيەنتتەردى قولداۋ جانە ىشكى ساراپتاما قىزمەتىنە جۇگىنە الادى. ەگەر مۇنىمەن دە ماسەلە شەشىلمەسە، وندا ازامات 1414 ءبىرىڭعاي بايلانىس ورتالىعىنا نەمەسە مەدساقتاندىرۋ قورىنىڭ ارنايى سايتىنا جۇگىنۋى كەرەك. سودان كەيىن قور ماماندارى سۇراقتى شەشۋگە كىرىسەدى. ءبىر نارسەنى ەسكەرۋ كەرەك، شۇعىل مەديسينالىق كومەك قاجەت بولعان جاعدايدا ەمدەلۋشىنىڭ مەدساقتاندىرۋدان وتكەنى ماڭىزدى ەمەس. ال ەگەر جوسپارلى ەم-دوم بولسا، دياگنوستيكالىق تەكسەرۋلەردى كۇتۋ مەرزىمى 10 كۇننەن اسپاۋى ءتيىس، -دەيدى مەديسينالىق ساقتاندىرۋ قورى الماتى قالالىق فيليالىنىڭ ديرەكتورى تىلەۋحان ابىلدايەۆ.