دەنساۋلىق ساقتاۋ مينيسترلىگى مەديسينالىق قىزمەتتەرگە تاريفتەردى كەزەڭ-كەزەڭىمەن كوتەرۋگە كىرىسەدى.
باسىمدىق – بالالار جانە بوساندىرۋ. بۇل تۋرالى مينيسترلىكتىڭ باسپا ءسوز قىزمەتى ءمالىم ەتتى، دەپ حابارلايدى اlmaty-akshamy.kz.
دەنساۋلىق ساقتاۋ مينيسترلىگى مەديسينالىق قىزمەتتەرگە قاتىستى تاريفتەردى قايتا ەسەپتەدى. نەگىزگى ماقسات – مەديسينالىق ۇيىمدارعا قارجىلىق جۇكتەمەنى ازايتۋ جانە بارلىق ازامات ءۇشىن جوعارى ساپالى مەديسينالىق كومەكتىڭ قولجەتىمدىلىگىن قامتاماسىز ەتۋ.
2024 جىلعى 1 ماۋسىمنان باستاپ قابىلدانعان شەشىمدەرگە سايكەس جۇكتى جانە بوسانعان ايەلدەرگە، سونداي-اق ستاسيونارلىق جاعدايدا بالالارعا شۇعىل مەديسينالىق كومەك كورسەتەتىن ۇيىمدار ءۇشىن تاريفتەر كوتەرىلەتىن بولادى.
«تاريفتەردىڭ كوتەرىلۋى ازاماتتاردىڭ مەديسينالىق كومەك الۋعا ارنالعان قالتا شىعىسىن ازايتۋعا، سونداي-اق مەديسينالىق ۇيىمدارعا سوڭعى جىلدارى جينالعان ينفلياسيالىق شىعىنداردى وتەۋگە جانە دەنساۋلىق ساقتاۋ سالاسىنداعى تۇراقتىلىقتى قامتاماسىز ەتۋگە مۇمكىندىك بەرەدى. ساقتاندىرۋ اكتيۆتەرىنىڭ ەسەبىنەن قوسىمشا بولىنەتىن قاراجاتتىڭ جالپى سوماسى دەنساۋلىق ساقتاۋ جۇيەسىنىڭ ءتيىمسىز شىعىستارىن وڭتايلاندىرۋ ناتيجەسىندە بوساتىلدى جانە 20 ميلليارد تەڭگە بولدى»، - دەلىنگەن حابارلامادا.
ابدومينالدىق حيرۋرگيا، ينفەكسيا، نيەۆرولوگيا، گاستروەنتەرولوگيا، كارديولوگيا، تراۆماتولوگيا جانە ورتوپەديا، نەفرولوگيا، ەندوكرينولوگيا، ونكوگەماتولوگيا سياقتى ءبىرقاتار باسقا باعىت بويىنشا تاريفتەردى كەزەڭ-كەزەڭىمەن ارتتىرۋ جوسپارلانىپ وتىر.
بۇل مەملەكەت مەديسينالىق ۇيىمدارعا مەديسينالىق قىزمەت كورسەتۋگە بايلانىستى شىعىستاردى كەزەڭ-كەزەڭىمەن وتەيتىنىن بىلدىرەدى.