مەديسينا قىزمەتكەرلەرىنىڭ جالاقىسى كوتەرىلەدى

بۇل تۋرالى دەنساۋلىق ساقتاۋ ءمينيسترى اجار عينيات ۇكىمەت وتىرىسىندا ايتتى، دەپ حابارلايدى Almaty-akshamy.kz 

«اۋىلدىق جەردە دەنساۋلىق ساقتاۋدى جاڭعىرتۋ جۇمىستارى بويىنشا بەكىتىلگەن ۇلتتىق جوبا شەڭبەرىندە 655 مەديسينالىق-سانيتارلىق العاشقى كومەك وبەكتىسىن سالۋ، سونداي-اق جاراقتاندىرۋ، كۇردەلى جوندەۋ، رەكونسترۋكسيالاۋ جولىمەن 32 كوپبەيىندى اۋداندىق ورتالىق اۋرۋحانانى جاڭعىرتۋ كوزدەلەدى. بۇل ءوز كەزەگىندە اۋىل تۇرعىندارى ءۇشىن مەديسينالىق كومەكتىڭ قولجەتىمدىلىگىن قامتاماسىز ەتۋگە مۇمكىندىك بەرەدى»، - دەدى اجار عينيات.

ءمينيستردىڭ ايتۋىنشا، مەديسينا ماماندىعىنىڭ بەدەلىن ارتتىرۋ شەڭبەرىندە ءبىرقاتار ءىس-شارا جۇزەگە اسىرىلىپ جاتىر. ماسەلەن، 2023 جىلدان باستاپ ۇزدىكسىز ينتەگراسيالانعان مەديسينالىق ءبىلىم بەرۋ باعدارلامالارىن ەنگىزۋ كوزدەلگەن.

سونىمەن قاتار 2023 جىلدان باستاپ رەزيدەنتۋراعا گرانتتاردى قوسىمشا 70%-عا ۇلعايتۋ باستالدى. مەديسينالىق جوعارى وقۋ ورىندارىندا ءبىلىم الۋشىلاردىڭ ستيپەندياسى جىل سايىن 15-20%-عا ۇلعايتىلادى. دارىگەرلەردىڭ جالاقىسىن 30%-عا، ورتا مەديسينا قىزمەتكەرلەرىنىڭ جالاقىسىن 20%-عا ارتتىرۋ جوسپارلانعان.