الماتىنىڭ ەڭ كورىكتى ءارى كورنەكتى ورىندارىنىڭ ءبىرى – «مەدەۋ» مۇز ايدىنىنا 28 جەلتوقسان كۇنى 50 جىل تولادى.
بۇگىن «مەدەۋ» بيىك تاۋلى سپورت كەشەنىنىڭ 50 جىلدىعىنا مۇز ايدىنى اۋماعىندا سالتاناتتى مەرەكە ءوتىپ جاتىر.
مەرەكەلىك ءىس-شارانىڭ الدىندا الماتى قالاسى سپورت عيماراتتارى ديرەكسياسىنىڭ باسشىسى ەلەنا ءتو، «مەدەۋ» مۇز ايدىنى قۇرىلىس اۆتورلارىنىڭ ءبىرى بوريس ياگلينسكيي، 1998 جىلعى وليمپيادا ويىندارىنىڭ قولا جۇلدەگەرى ليۋدميلا پروكاشيەۆا جانە 2019 جىلعى الەم چەمپيوناتىنىڭ كۇمىس جۇلدەگەرى، قازاقستاننىڭ ءتورت دۇركىن چەمپيونى ەليزابەت تۇرسىنبايەۆانىڭ قاتىسۋىمەن باسپا ءسوز كونفەرەنسياسى ءوتتى.
«مەدەۋ» مۇز ايدىنىنىڭ 50 جىلدىعىنا وراي مەرەكەلىك كەش ۇيىمداستىرىپ، بىزگە جەتكەن وسىنداي كورنەكتى ورىننىڭ تاريحىن، مۇندا ورىن العان قانشاما تاريحي وقيعالاردى كەلەشەك ۇرپاققا كورسەتكىمىز كەلدى. سونداي-اق، بۇگىن مەرەيتويعا وراي مۇز ايدىنىندا جاس كونكيشىلەر اراسىندا اشىق جارىس وتكىزدىك. بۇل دا بۇرىننان كەلە جاتقان ءداستۇر. 2023-2024 جىلدارى «مەدەۋ» سپورت كەشەنىندە بىرنەشە حالىقارالىق جارىستى وتكىزۋدى جوسپارلاپ وتىرمىز. وسىنداي شارالاردىڭ ارقاسىندا «مەدەۋدىڭ» سپورتتىق اتاعىن قايتارامىز دەگەن ۇمىتتەمىن»، – دەدى الماتى قالاسى سپورت عيماراتتارى ديرەكسياسىنىڭ باسشىسى ەلەنا ءتو.
«مەدەۋ» مۇز ايدىنىنىڭ 50 جىلدىعىنا ارنالعان مەرەكە كورنەكتى قازاق سپورتشىلارى مەن جاتتىقتىرۋشىلارىنىڭ شەرۋىمەن اشىلدى. «ۇرپاقتان ۇرپاققا» اتالعان كەش رەسمي اشىلعان سوڭ الماتى قالاسى اكىمىنىڭ ورىنباسارى ارمان قىرىقبايەۆ قالا تۇرعىندارىن وسىناۋ ايتۋلى مەرەكەمەن قۇتتىقتادى.
«تەك الماتىنىڭ ەمەس، قازاقستاننىڭ كوزايىمى، تۋريستەر مەن قالا تۇرعىندارىنىڭ، جاستاردىڭ سۇيىكتى دەمالىس ورنى – «مەدەۋ» مۇز ايدىنىنىڭ 50 جىلدىعىمەن قالا باسشىلىعىنىڭ اتىنان قۇتتىقتايمىن! جارتىعاسىرلىق تاريحى بار بۇل جەردە 350-گە جۋىق الەمدىك رەكورد ورناتىلعان. الداعى جىلدارى «مەدەۋدە» ۇلكەن جوندەۋ جۇمىستارى جاسالادى. كورنەكتى ورىننىڭ تاريحي كەلبەتى ساقتالادى، تەك ينفراقۇرىلىمىن جەتىلدىرۋ جوسپارلانعان»، – دەدى ا.قىرىقبايەۆ.
قۇتتىقتاۋ العىسوزىنەن كەيىن قالا تۇرعىندارى مەن وڭتۇستىك استانا قوناقتارى الدىندا الەمگە ايگىلى سپورت شەبەرلەرى ونەر كورسەتتى. اتاپ ايتقاندا، مۇز ايدىنىندا ءوزىنىڭ ەرەكشە باعدارلاماسىمەن قازاقستاندىق مانەرلەپ سىرعاناۋشى، 2019 جىلعى الەم چەمپيوناتىنىڭ كۇمىس جۇلدەگەرى، 2019 جىلعى قىسقى ۋنيۆەرسيادانىڭ كۇمىس جۇلدەگەرى جانە II قىسقى جاسوسپىرىمدەر وليمپياداسىنىڭ قولا جۇلدەگەرى ەليزابەت تۇرسىنبايەۆا ونەر كورسەتتى.
مەرەكە اياسىندا اناستاسيا يگناتيەۆانىڭ ديريجەرلىك ەتۋىمەن اتى اڭىزعا اينالعان «مۇزدى سيمفونيا» مۇز بالەتى مەن يليا وۆەربۋحتىڭ «جۇرەك تە جانىپ تۇر» گالا-شوۋى ءوتتى. سونىمەن قاتار، كورەرمەندەر قازاقستاندىق تۇڭعىش مۇز شوۋى – «Olumpic Show» قويىلىمىن تاماشالادى.
ءقازىر كەشكى كونسەرتتىڭ باستى جۇلدىزى رەتىندە تانىمال قازاقستاندىق ءانشى Moldanazar ونەر كورسەتەدى. شوۋ بارىسىندا ءتۇرلى ويىن-ساۋىق، ينتەراكتيۆتى الاڭدارى مەن تاريحي ايماقتار جۇمىس ىستەپ تۇر. مەرەكەلىك شارا ءتۇرلى-تۇستى وتشاشۋمەن اياقتالادى.
ايتا كەتكەن ءجون، 1972 جىلى 28 جەلتوقسان كۇنى الماتىدا بۇكىل الەمگە ايگىلى «مەدەۋ» مۇز ايدىنىنىڭ اشىلۋى بولدى.