بالۋان شولاق اتىنداعى سپورت جانە مادەنيەت سارايىندا شاحماتتىڭ راپيد جانە بليس تۇرىنەن الەم چەمپيوناتى اشىلدى.
سالتاناتتى اشىلۋ راسىمىنە حالىقارالىق شاحمات فەدەراسياسىنىڭ پرەزيدەنتى اركاديي دۆوركوۆيچ، الماتى اكىمى ەربولات دوسايەۆ، مادەنيەت جانە سپورت ءمينيسترى داۋرەن ابايەۆ، الەم چەمپيوناتىنا قاتىسۋشى ەلدەردىڭ ەلشىلەرى، مەملەكەت جانە قوعام قايراتكەرلەرى قاتىستى.
«الماتىعا الەمنىڭ ۇزدىك شاحماتشىلارى جينالدى. وسىنداي ماڭىزدى جارىستى وتكىزۋگە اتسالىسقان حالىقارالىق شاحمات فەدەراسياسىنا العىسىمدى بىلدىرەمىن. مۇنداي الەمدىك جارىستىڭ قازاقستاندا ءوتۋى سپورتتىڭ بۇل ءتۇرىن ەلىمىزدە دامىتۋعا كومەكتەسەتىنى ءسوزسىز. ەلىمىزدىڭ شاحماتشىلارى ەرەسەكتەر مەن جاسوسپىرىمدەر اراسىندا دا ءىرى حالىقارالىق جەڭىستەرگە جەتىپ ءجۇر. ءبىز شاحماتتى ەلىمىزدە ءارى قاراي دامىتۋدى جالعاستىرامىز»، – دەلىنگەن پرەزيدەنت قۇتتىقتاۋىندا.
الماتى قالاسىنىڭ اكىمى ەربولات دوسايەۆ جارىسقا قاتىسۋشىلارعا ساتتىلىك تىلەدى.
«شاحماتتان الەم چەمپيوناتىنىڭ الماتىدا ءوتۋى – ءبىز ءۇشىن ۇلكەن مارتەبە. بۇل شارا شاھارىمىز ءۇشىن وسى جىلدىڭ سوڭعى اۋقىمدى جارىسى. قالا قوناقتارى الماتىنىڭ جىلى شىرايىن سەزىنەدى دەگەن ۇمىتتەمىن. شىن مىقتى جەڭىسكە جەتسىن»، – دەدى قالا باسشىسى ەربولات دوسايەۆ.
ءوز كەزەگىندە مادەنيەت جانە سپورت ءمينيسترى داۋرەن ابايەۆ حالىقارالىق جارىستىڭ ەلىمىز ءۇشىن وڭ اسەر ەتەتىنىن ايتتى.
«الماتى اكىمدىگىنە جارىستى ۇيىمداستىرىپ، قوناقجايلىق تانىتقانى ءۇشىن العىس ايتامىن. بۇل ءتۋرنيردىڭ ەلىمىز ءۇشىن وڭ اسەر ەتەتىنىنە تولىق سەنىمدىمىن. مىڭداعان بالالارىمىز وسى جارىستان سوڭ شاحماتپەن اينالىسىپ، ولاردىڭ اراسىنان بولاشاق چەمپيوندار شىعاتىنىنا سەنىمدىمىن. جارىسقا قاتىسۋشىلارعا ساتتىلىك تىلەيمىن»، – دەدى د.ابايەۆ.
جاھاندىق دوداعا 50 ەلدىڭ ۇزدىك 290 شاحماتشىسى قاتىسادى. اشىق تۋرنيرگە 176 ويىنشى قاتىسادى. سايىستىڭ ءفاۆوريتى - سوڭعى 10 جىلداعى الەم چەمپيونى ماگنۋس كارلسەن (نورۆەگيا).
ايەلدەر تۋرنيرىندە 100-دەن استام سپورتشى ب ا ق سىنايدى. قازاقستاننىڭ نامىسىن الەمگە ايگىلى شاحماتشىلار جانسايا ابدىمالىك پەن ءبيبىسارا اساۋبايەۆا قورعايدى.
چەمپيونات 26-28 جەلتوقسان ارالىعىندا راپيد ويىندارىمەن باستالادى، بليس ويىندارى 29-30 جەلتوقسان ارالىعىندا وتەدى. سول كۇنى جەڭىمپازداردى ماراپاتتاۋ جانە جارىستىڭ جابىلۋ ءراسىمى بولادى.
2022 جىل فيدە شاحماتتاعى ايەلدەر جىلى دەپ جاريالاندى. وسى ءىس-شارا اياسىندا 2022 جىلعى 27 جەلتوقساندا فيدە باسقارۋشى ديرەكتورى، ايەلدەر گروسسمەيستەرى دانا رەيزنيەسە-وزولا شەبەرلىك ساعاتىن جانە تالانتتى قازاقستاندىق قىزدارعا ارناپ ءبىر مەزگىلدە ويىن سەانسىن وتكىزەدى.
جارىس كۇندەرى تورەشىلەر كورپۋسىنا ارنالعان فيدە سەمينارلارى، بالالار مەن بارلىق اۋەسقويعا ارنالعان ءبىر مەزگىلدە ويىن سەانستارى مەن بليستەر، IT سالاداعى باعدارلاماشىلار ءۇشىن جەكە تۋرنير وتەدى.
ءتۋرنيردىڭ ۇيىمداستىرۋشىلارى فيدە جانە قازاقستان شاحمات فەدەراسياسى. چەمپيونات الماتى قالاسى اكىمدىگىنىڭ جانە قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن وتكىزىلەدى.
شاحمات سايىسىنا بيلەتتەردى ساتۋ سەرۆيسىنەن الۋعا بولادى، بالالارعا كىرۋ تەگىن. بۇعان قوسا، تۋرنير chess24.com جانە chess.com سىندى جاھاندىق ونلاين الاڭداردا كورسەتىلەدى.
چەمپيونات كەستەسى مەن باعدارلاماسىن چەمپيوناتتىڭ worldrapidandblitz2022.fide.com سايتىنان بىلۋگە بولادى.