ماۋسىم ايىندا اپتاپ ىستىق بولادى - قازگيدرومەت

تەرمومەتر باعاندارى +40°س-قا دەيىن كوتەرىلۋى مۇمكىن

ماۋسىم ايىندا ەلىمىزدىڭ باسىم بولىگىندە 40°س اپتاپ ىستىق بولادى دەپ بولجانىپ وتىر، دەپ حابارلايدى Almaty-akshamy.kz «قازگيدرومەت» رمك باسپا ءسوز قىزمەتىنە سىلتەمە جاساپ. 
سينوپتيكتەردىڭ بولجامىنشا، ماۋسىم ايىنىڭ باسىندا قازاقستاننىڭ باتىس جانە وڭتۇستىك وڭىرلەرىندە جازعى اۋا رايى ساقتالادى. كۇندىز +25+33°س، ماڭعىستاۋ وبلىسىنىڭ وڭتۇستىگىندە الدەقايدا ىستىق +38°س. ەلىمىزدىڭ باتىسىن قوسپاعاندا، قازاقستاننىڭ كوپتەگەن وبلىسىندا اتموسفەرالىق اعىنداردىڭ وتۋىنە وراي وتكىنشى جاڭبىر جاۋادى، كەي جەرلەردە نايزاعاي ويناپ، بۇرشاق جاۋادى، قاتتى جەل تۇرادى. تەمپەراتۋرا فونى سالىستىرمالى تۇردە تومەن. كۇندىز +15+23°س، ەلدىڭ شىعىسى مەن وڭتۇستىك-شىعىسىندا +20+28°س. ەلىمىزدىڭ سولتۇستىك-باتىس بولىگىندە تۇندە سولتۇستىك انتيسيكلونمەن اۋا تەمپەراتۋراسى تومەندەۋى مۇمكىن. ماۋسىمنىڭ ءبىرىنشى ونكۇندىگىنىڭ ورتاسىنا قاراي، جەرورتا تەڭىزى مەن ورتا ازيانىڭ شىعىس جاعالاۋىنان كەلەتىن اۋا ماسسالارى، رەسپۋبليكانىڭ بارلىق اۋماعىندا وتە ىستىق اۋا رايىن تۋىنداتادى. وسىلايشا تەرمومەتر باعاندارى +28+36°س بەلگىسىنە دەيىن، قازاقستاننىڭ شەتكى وڭتۇستىك-باتىسى مەن وڭتۇستىگىندە جەكەلەگەن كۇندەرى +40°س-قا دەيىن كوتەرىلۋى مۇمكىن. ءبىرىنشى ونكۇندىكتىڭ سوڭىندا جانە ەكىنشى ونكۇندىكتىڭ باسىندا رەسپۋبليكانىڭ باتىسىندا، سودان كەيىن ەلدىڭ قالعان اۋماعىندا ىستىق تۇسە باستايدى. ماۋسىمنىڭ ەكىنشى جانە ءۇشىنشى ونكۇندىگىندە ەكپىندى جەل، نايزاعاي، بۇرشاق، شاڭدى داۋىل مەن قىسقا مەرزىمدى جاڭبىر ىستىق، تۇراقتى اۋا رايىمەن الماستىرىلادى. اۋا تەمپەراتۋراسى اۋىتقۋى ىقتيمال:  قازاقستاننىڭ سولتۇستىك جارتىسىندا تۇندە +15+22°س-تان +5+13°س-قا دەيىن، كۇندىز +28+36°س-تان +18+25°س-قا دەيىن؛ ەلدىڭ وڭتۇستىك جارتىسىندا تۇندە +18+26°س-تان +10+16°س-قا دەيىن، كۇندىز +33+42°س-تان +25+30°س-قا دەيىن. ءبىر ايعا جاسالعان اۋا رايى بولجامىن كەڭەس رەتىندە پايدالانۋ كەرەك، ول كەيىننەن سينوپتيكالىق جاعدايدىڭ وزگەرۋىنە قاراي تۇزەتىلەدى جانە ونكۇندىككە ارنالعان اۋا رايى بولجامدارىمەن ناقتىلانادى.