حالىققا التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان.
باعدارلاما قولعا الىنعالى جالپى سالماعى 3،26 تونناعا جۋىق 96 739 التىن قۇيما ساتىلعان، دەپ حابارلايدى Almaty-akshamy.kz
2022 جىلدىڭ ماۋسىم ايىندا ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتەرى جالپى سالماعى 65،6 كەلى 2 194 التىن قۇيمانى ساتتى.
التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى – 26%، ياعني، 25 000 دانا. ودان كەيىن 20 گرامدىق قۇيما سۇرانىسقا يە، 21 048 دانا (22%) ساتىلعان. 5 گرامدىق قۇيمادان 19 932 دانا (21%)، 100 گرامدىق قۇيمادان 19 017 دانا (19%)، 50 گرامدىق قۇيمادان 11 742 دانا (12%) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى.
التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.
باعدارلاما باستالعاننان بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتەر جالپى سالماعى 360 كەلى 14 686 التىن قۇيمانى كەرى ساتىپ العان، بۇل – جالپى ساتىلعان التىن قۇيمالاردىڭ 15%-ى. ولار كەرى ساتىپ العان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا ساتىلادى.
ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپقا سالىنىپ شىعادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ، سونداي-اق ساپا سەرتيفيكاتى بولىپ سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز.
ءقازىر التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى، سونداي-اق جەكەلەگەن بانكتىك ەمەس پۋنكتتەردەن ساتىپ الىپ، كەرى ساتۋعا بولادى.