سەنات ءتوراعاسى ماۋلەن اشىمبايەۆ تمد-عا مۇشە مەملەكەتتەردىڭ پارلامەنتارالىق اسسامبلەياسى بايقاۋشىلار ميسسياسىنىڭ وكىلدەرىمەن كەزدەستى. Almaty-akshamy.kz بۇل تۋرالى پالاتانىڭ باسپا ءسوز قىزمەتىنە سىلتەمە جاساپ حابارلايدى.
ماۋلەن اشىمبايەۆ پارلامەنتشىلەرگە قازاقستان پرەزيدەنتى سايلاۋىن بايقاۋعا قاتىسقانى ءۇشىن العىس ءبىلدىردى. سونداي-اق پالاتا سپيكەرى ەلىمىز حالىقارالىق بايقاۋشىلاردىڭ سايلاۋعا قاتىسۋىنا ۇلكەن ءمان بەرەتىنىن جانە وبەكتيۆتى مونيتورينگ ءۇشىن بارلىق قاجەتتى جاعداي جاسالعانىن اتاپ ءوتتى.
سەنات ءتوراعاسى سايلاۋدى تولىعىمەن ۇلتتىق زاڭناماعا جانە وسى سالاداعى حالىقارالىق ستاندارتتارعا سايكەس وتكىزۋ ءۇشىن قاجەتتى شارالار قابىلدانعانىن تىلگە تيەك ەتتى. بارلىق كانديدات ءۇشىن سايلاۋ الدىنداعى ۇگىت-ناسيحات جۇمىستارىن جۇرگىزۋگە تەڭ جاعداي جاسالعانى دا نازاردان تىس قالعان جوق.
سونىمەن قاتار م.اشىمبايەۆ پارلامەنتتىڭ ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسىنا توقتالدى. ادام قۇقىقتارىن قورعاۋ جۇيەسىن نىعايتۋعا، بيلىك تارماقتارى مەن ورتالىق پەن ايماقتار اراسىنداعى وكىلەتتىكتەر مەن جاۋاپكەرشىلىكتىڭ تەپە-تەڭدىگىن قامتاماسىز ەتۋگە ارنالعان جاقىندا قابىلدانعان كونستيتۋسيالىق زاڭدار تۋرالى دا ءسوز بولدى.
«قابىلدانعان كونستيتۋسيالىق زاڭدار ازاماتتارىمىزدىڭ سۇرانىسى مەن مۇددەلەرىنە ساي كەلەتىن جاڭا ساياسي مودەل قالىپتاستىرۋعا سەپتىگىن تيگىزەدى دەپ سەنەمىز. جاڭا نورمالار ازاماتتاردىڭ مەملەكەتتىك جانە ساياسي ينستيتۋتتارعا دەگەن سەنىمىن نىعايتۋعا دا ىقپال ەتەدى. الداعى پرەزيدەنت سايلاۋى قازاقستاندىقتاردى دەموكراتيالىق ترانسفورماسيا مەن رەفورمالار يدەياسى توڭىرەگىندە بىرىكتىرە تۇسەدى دەپ ۇمىتتەنەمىز»، – دەدى ماۋلەن اشىمبايەۆ.
ءوز كەزەگىندە تمد پاا بايقاۋشىلار ميسسياسىنىڭ كوورديناتورى ديلرابو مانسۋري سايلاۋ پروسەسىنىڭ جالپىعا بىردەي قابىلدانعان دەموكراتيالىق ستاندارتتارعا سايكەس جوعارى دەڭگەيىن اتاپ ءوتتى. تمد پاا پارلامەنتشىلەرى سەناتورلارعا كوپ جىلعى ءوزارا ءىس-قيمىل ءۇشىن العىسىن ءبىلدىرىپ، پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەندەرىن دە جەتكىزدى.