التىن مەدال العان وقۋشى 1 500 اەك، كۇمىس مەدال ءۇشىن 1 000 اەك، قولا مەدال ءۇشىن 500 اەك كولەمىندە اقشالاي سىياقى الادى
جىل باسىنان بەرى 252 قازاقستاندىق وقۋشى نەگىزگى پاندەر بويىنشا حالىقارالىق وليمپيادالاردا مەدال جەڭىپ الدى. ولار ەل قورجىنىنا 45 التىن، 78 كۇمىس، 129 قولا مەدال اكەلدى، دەپ حابارلايدى Almaty-akshamy.kz وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
ولار ماتەماتيكادان قاشىقتان وتكەن حالىقارالىق ازيا-تىنىق مۇحيتى وليمپياداسى، ماتەماتيكادان حالىقارالىق «جىبەك جولى» وليمپياداسى، ماتەماتيكادان بالقان وليمپياداسى، حيميادان وقۋشىلار اراسىنداعى حالىقارالىق مەندەلەيەۆ وليمپياداسى، فيزيكادان ازيا وليمپياداسى (APhO)، مامانداندىرىلعان مەكتەپتەردىڭ وقۋشىلارىنا ارنالعان ماتەماتيكا، فيزيكا جانە ينفورماتيكادان حالىقارالىق جاۋتىكوۆ وليمپياداسى سياقتى بەدەلدى قۇرلىقتىق وليمپيادالاردا قازاقستاننىڭ نامىسىن قورعادى.
«وسى جىلى حالىقارالىق پاندىك وليمپيادالارعا قاتىسۋشىلار سانى 600 وقۋشىعا دەيىن جەتتى. 27 وقۋشىمىز وتكەن جىلداردىڭ رەكوردىن جاڭارتىپ، ەڭ بەدەلدى 7 حالىقارالىق وليمپيادادا، اتاپ ايتقاندا، IMO، IPhO، IBO، IOL، IchO جانە ت.ب. وليمپيادالاردا جۇلدەلى ورىندارعا يە بولدى. وقۋشىلارىمىز وسى وليمپيادالارعا قاتىسۋ تاريحىندا العاش رەت 73 ملن تەڭگەدەن استام سىياقى الدى. سونداي-اق ولارعا وتاندىق جوعارى وقۋ ورىندارىندا وقۋ ءۇشىن گرانتتار بەرىلدى. كەلەسى جىلى بالالارعا وسىنداي قولداۋ كورسەتىلەتىن وليمپيادالار ءتىزىمى 7-دەن 14-كە دەيىن ارتادى»، - دەدى ورتا ءبىلىم بەرۋ كوميتەتىنىڭ ءتوراعاسى گۇلميرا كارىموۆا.
التىن مەدال العان وقۋشى 1 500 اەك، كۇمىس مەدال ءۇشىن 1 000 اەك، قولا مەدال ءۇشىن 500 اەك كولەمىندە اقشالاي سىياقى الادى. سونداي-اق وقۋشىلاردى جارىسقا دايىنداعان ۇستازدار دا ءبىرجولعى سىياقى الادى.