كونستيتۋسيالىق رەفورما –جاڭا قازاقستاننىن نەگىزى
سەنات سپيكەرى ماۋلەن اشىمبايەۆتىڭ توراعالىعىمەن سەناتورلار كەڭەسىنىڭ وتىرىسى ءوتتى. وندا كەڭەس مۇشەلەرى «كونستيتۋسيالىق رەفورما –جاڭا قازاقستاننىن نەگىزى» تاقىرىبىندا وي ءوربىتتى، دەپ حابارلايدى Almaty-akshamy.kz سەناتتىڭ باسپا ءسوز قىزمەتىنە سىلتەمە جاساپ.
وتىرىستى اشقان ماۋلەن اشىمبايەۆ بۇگىندە قازاقستان دامۋدىڭ جاڭا كەزەڭىنە قادام باسقانىن ايتتى. سونداي-اق مەملەكەت باسشىسى قاسىم-جومارت توقايەۆتىڭ باستاماسىمەن جاڭا قازاقستان قۇرۋ جولىندا كەشەندىرەفورمالار قولعا الىنعانىن تىلگە تيەك ەتتى.
«ءقازىر ەلىمىز ءۇشىن وتە ماڭىزدى كەزەڭ. اۋقىمدى ءارى كەشەندى رەفورمالار قولعا الىنىپ، قارقىندى جۇرگىزىلىپ جاتىر. بۇل رەفورمالاردىڭ نەگىزگى ماقساتى ادىلەتتى ساياسي-ەكونوميكالىق جۇيە قالىپتاستىرۋ. ادىلەتتى جۇيە دەگەنىمىز، ءبىرىنشى كەزەكتە، زاڭ ۇستەمدىگىن ورناتۋ جانە ازاماتتاردىڭ بارىنە بىردەي تەڭ مۇمكىندىك جاساۋ. بۇل جاڭا قازاقستان قۇرۋدىڭ نەگىزگى ءمانى ەكەنى ءسوزسىز»، – دەدى سەنات ءتوراعاسى.
سونداي-اق ماۋلەن اشىمبايەۆ ەل پرەزيدەنتىنىڭ باستاماسىمەن قولعا الىنعان جانە رەفەرەندۋم كەزىندە قازاقستاندىقتاردىڭ باسىم بولىگى قولداۋ بىلدىرگەن رەفورمالاردى ساپالى زاڭنامامەن قامتاماسىز ەتۋ ءقازىر پالاتانىڭ الدىندا تۇرعان ماڭىزدى مىندەتتەردىڭ ءبىرى ەكەنىن ايتتى. بۇل رەتتە الدىڭعى بۋىن مەملەكەت قايراتكەرلەرىنىڭ، ونىڭ ىشىندە سەناتورلار كەڭەسىنىڭ مۇشەلەرىنىڭ مول تاجىريبەلەرى مەن ءبىلىمى ۇلكەن مانگە يە.
وتىرىس بارىسىندا سەناتتىڭ كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى ۆلاديمير ۆولكوۆ بايانداما جاسادى. ول قۇقىقتىق سالانى، ونىڭ ىشىندە سايلاۋ جۇيەسىن، سايلاۋ پروسەسىن جاڭعىرتۋدىڭ، قۇقىق قورعاۋ ينستيتۋتتارىن كۇشەيتۋدىڭ ماڭىزدىلىعىنا ەگجەي-تەگجەيلى توقتالدى.
«مەملەكەت باسشىسى ۇسىنعان ساياسي رەفورمالار ىرگەلى سيپاتقا يە. ولار قوعامنىڭ ساياسي جۇيەنى دەموكراتيالاندىرۋعا دەگەن كوپجىلدىق سۇرانىسىنان تۋىنداپ وتىر. سونداي-اق بۇل وزگەرىستەر ازاماتتاردىڭ مەملەكەتتىك شەشىمدەرگە ىقپال ەتۋ جانە جاڭا قازاقستان قۇرۋعا تىكەلەي قاتىسۋ مۇمكىندىگىن قامتاماسىز ەتۋدى كوزدەيدى»، – دەدى ۆلاديمير ۆولكوۆ.
وتىرىس كەزىندە سەناتورلار كەڭەسىنىڭ مۇشەلەرى تولەۋبەك مۇقاشيەۆ، سەرىك اقىلباي، گەورگيي كيم، دۋلات قۇسداۋلەتوۆ جانە سەرىك بەكتۇرعانوۆ ءسوز سويلەپ، كونستيتۋسيالىق رەفورمانى ىسكە اسىرۋ جونىندەگى ويلارىمەن ءبولىستى.