ق ر سەنات سپيكەرى ماۋلەن اشىمبايەۆ وڭتۇستىك كورەيا رەسپۋبليكاسىنىڭ قازاقستانداعى ەلشىسى كۋ حونگ-سوكپەن كەزدەستى
كەزدەسۋدە تاراپتار ەكى ەلدىڭ باسشىلىعى جۇرگىزگەن جۇمىستاردىڭ ناتيجەسىندە سوڭعى جىلداردا قازاقستان مەن وڭتۇستىك كورەيا اراسىنداعى قارىم-قاتىناستىڭ اياسى كەڭەيىپ، ستراتەگيالىق سەرىكتەستىككە جالعاسقانىن اتاپ ءوتتى، دەپ حابارلايدى Almaty-akshamy.kz
ماۋلەن اشىمبايەۆ قاڭتار وقيعاسىنان كەيىن قازاقستاندا قولعا الىنعان ماڭىزدى جاڭعىرتۋلارعا توقتالدى. سەنات سپيكەرى قازىرگى تاڭدا ەل ازاماتتارى مەملەكەت باسشىسى قاسىم-جومارت توقايەۆ ۇسىنعان «جاڭا قازاقستان» تۇجىرىمداماسىن كەڭىنەن تالقىلاپ جاتقانىن ايتتى.
«بۇگىندە سەنات جۇمىسىنىڭ نەگىزگى باعىتتارىنىڭ ءبىرى - ەل پرەزيدەنتىنىڭ جاڭعىرۋ باعدارىن زاڭنامالىق تۇرعىدان قولداۋ. قولعا الىنعان رەفورمالاردى ىسكە اسىرۋ كەزىندە الەۋمەتتىك تەڭسىزدىك پەن كەدەيلىككە قارسى كۇرەس جانە ساياسي جۇيەنى ودان ءارى دەموكراتيالاندىرۋ اسا ماڭىزدى باسىمدىقتار بولىپ بەلگىلەندى. جاڭا كۇن تارتىبىندە دە ەكونوميكالىق رەفورمالاردىڭ ماڭىزى زور. سەناتورلار بۇل جۇمىستاردىڭ تابىستى ىسكە اسىرىلۋى ءۇشىن قاجەتتى زاڭداردى جەدەل قابىلداۋعا دايىن»، – دەدى ماۋلەن اشىمبايەۆ.
ءوز كەزەگىندە ەلشى قازاقستان پرەزيدەنتىنىڭ باستاماسىمەن جۇرگىزىلىپ جاتقان رەفورمالاردىڭ ماڭىزدى ەكەنىن ايتتى. سونداي-اق رەسمي سەۋل قازاقستاننىڭ ەلدە الەۋمەتتىك تەڭسىزدىكتى جانە كەدەيلىكتى تومەندەتۋگە ارنالعان باعىت-باعدارىن تولىق قولدايتىنىن جەتكىزدى. سونىمەن قاتار سۇحباتتاسۋشىلار ۋكرايناداعى وقيعالارعا نازار اۋداردى. ەكى تاراپ تا جاعدايدى بەيبىت جولمەن شەشۋدىڭ ماڭىزدى ەكەنىنە باسىمدىق بەردى. ماۋلەن اشىمبايەۆ، بۇعان دەيىن مەملەكەت باسشىسى اتاپ وتكەندەي، قازاقستاننىڭ گۋمانيتارلىق كومەك كورسەتۋگە جانە كەلىسسوزدەر جۇرگىزۋ ءۇشىن ارااعايىندىق تانىتۋعا دايىن ەكەنىن تىلگە تيەك ەتتى. كەزدەسۋ سوڭىندا تاراپتار قازاقستان مەن وڭتۇستىك كورەيا اراسىنداعى ىنتىماقتاستىقتى ودان ءارى ارتتىرۋعا جانە ءوزارا ءىس-قيمىلدى كەڭ اۋقىمدا جۇرگىزۋگە ەكى ەل دە مۇددەلى ەكەنىن ايتتى.