ماۋلەن اشىمبايەۆ: ازاماتتارىمىزدىڭ بەكەم بىرلىگىنىڭ ارقاسىندا قول جەتكىزىلگەن جەڭىس

ادىلەتتى قازاقستان قۇرامىز دەپ تولىق سەنەمىن.

سەنات ءتوراعاسى ماۋلەن اشىمبايەۆ كەزەكتەن تىس وتكەن سايلاۋعا بايلانىستى ءوز پىكىرىن ءبىلدىردى، دەپ حابارلايدى Almaty-akshamy.kz.

سەناتور ءوز پىكىرىن ورتالىق سايلاۋ كوميسسياسى قازاقستان پرەزيدەنتى سايلاۋىنىڭ الدىن الا قورىتىندىسىن جاريالاعاننان كەيىن ايتتى. ەل ازاماتتارىنىڭ 81،31 پايىزى قاسىم-جومارت كەمەل ۇلى توقايەۆقا داۋىس بەرگەنى بەلگىلى بولدى.

«بۇل – مەملەكەت باسشىسىنىڭ اۋقىمدى رەفورمالارى مەن باستامالارىنا دەگەن حالىقتىڭ قولداۋى. سونداي-اق ازاماتتارىمىزدىڭ بەكەم بىرلىگىنىڭ ارقاسىندا قول جەتكىزىلگەن جارقىن جانە ايقىن جەڭىس»،- دەپ جازدى ماۋلەن اشىمبايەۆ ءوزىنىڭ Facebook-تەگى پاراقشاسىندا. 

سونداي-اق سەنات سپيكەرى سايلاۋداعى حالىقتىڭ بەلسەندىلىگىن اتاپ ءوتتى. سايلاۋعا 8،3 ملن ادام نەمەسە بارلىق سايلاۋشىنىڭ 69،44 پايىزى قاتىسقان.

داۋىس بەرۋ بارىسىن باقىلاعان وتاندىق جانە حالىقارالىق بايقاۋشىلار سايلاۋدىڭ جوعارى دەڭگەيدە ۇيىمداستىرىلعانىن جانە ۇلتتىق زاڭنامالار مەن حالىقارالىق ستاندارتتارعا ساي وتكەنىن مالىمدەدى.

«وسىعان وراي قاسىم-جومارت كەمەلۇلىن جانە بارشا جاقتاستارىن ايقىن جەڭىسپەن تاعى دا قۇتتىقتايمىن! پرەزيدەنتىمىزدىڭ ساياساتى اياسىندا ءبارىمىز بىرگە جاڭا، وركەندەگەن، دەموكراتيالى جانە ادىلەتتى قازاقستان قۇرامىز دەپ تولىق سەنەمىن»، - دەدى ماۋلەن اشىمبايەۆ.